Shillong, Jymmang:
Ka Sorkar Jylla ka phai khmat lang sha ki Village Defence Party (VDP) ban ïakhun ïa u drok ha kaba ki kynhun bapher bapher kin donbynta lang bad ka Sorkar ruh kan ai jingkyrshan lang.
U Myntri ka tnat Social Welfare u Bah Paul Lyngdoh u la lum ïa ka jingïalang jong ki tnat bapher bapher naduh ka tnat Pulit, Social Welfare, ki seng trei mon sngewbha bad Meghalaya Aids Control Society (MACS) kumno ban nang pynkhlaiñ ka jingïakhun pyrshah ïa u drok.
U Bah Paul u la ong ba ka bynta kaba dang donkam ban phaikhmat ka dei ka jingpynïar shuh shuh ïa ka jingdonbynta lang ki shnong ki thaw khamtam ka jingkynthup lang ïa ki VDP ha kane ka jingïakhun.
Haba ïadei bad ki De-addiction centre, u Myntri u la ong ba ka Sorkar ka ai jingkyrshan ïa kine ki Centre ha kaba u la ai nuksa ruh ïa ka Mawlai Town Dorbar kaba la sdang ïa ka jingsumar ban pynbha pat ïa kiba la ngop bad kyrni ha u drok.
Kumta u la ong ba donkam ban ïasyllok ïa kiba ngop bad pynwan sha ki jaka sumar.
Haba kylli halor ka jingkhynra bad thombor ïa kiba la kyrni ha u drok, u Bah Paul u la ong ba ki briew kiba don ka lon babha ha ka imlang sahlang ki dei ban ïarap lang ha ka jingïakhun pyrshah ïa u drok ym ban leh da ka bor namar lada ïaid da ka lynti kaba jai jai yn ïoh ruh ïa ki sakhi kiba biang wat ïa ki nongdie drok bad lah ban tehlakam.
U la ong ba ka Sorkar ka shim ki sienjam kumno ban ïakhun pyrshah ïa u drok da kaba pyntreikam ïa ka projek Drug Reduction Elimination and Action Mission (DREAM).
