Jowai, Jymmang 29
Ka jingbteng jong u slap ban ther ryngkat ka jingtied u pyrthat bad ka lyer ha kine ar sngi ka la wanrah ka jingshlei um ha ki wah, ka jingtwa khyndew ha kylleng ki bynta ka rilum Jaiñtia kaba la wanrah ka jingthut ha ka leit ka wan jong ki paidbah.
Katkum ka jingïoh-lum khubor la ong ba kawei ka longkmie kaba la leit ban tong dohkha, ka la lait im na ka jingshah rong ha ka umsaw ha Wah Myntdu. La ïathuh ba kane ka longkmie katba ka dang tong doh ha ki bynta ka jingkieng doi-doi, kyndit-kynsan la wan ka umsaw kaba la ïoh ban rong lang ïa kane ka longkmie.
Hynrei wat hapdeng kane ka jingjia, kane ka longkmie ka la ïoh bat ïa ki kynja dieng kaba la pynlah ban per ha sla um bad na ka liang ki paidbah kiba la ïohi ïa ka, ki la ïarap ha ki bynta sharum jong kane ka wah.
Ha kawei pat ka liang, namar ka jingdang bteng jong ka jingther jong u slap ba jur bad ka lyer na ka liang ki bor pynïaid district jong ka East bad West Jaiñtia Hills ki la pynmih hukum ban khang shuwa ïa ki skul ha ka 29 bad 30 tarik mynta u bnai. Kane ka jingkhang ka kynthup ïa ki skul, kolej bad skulbah na ka bynta ka jingshngaiñ ki khynnah bad ki samla pule.
Ha West Jaiñtia Hills ka jingther jong u slap ka la wanrah ka jingshlei um ha ki lynti ki syngkien, ki surok khamtam ka jingtuid jong ka khyndew bad ki maw sha ka Wah Myntdu na ka jingshna ïa ka surok Jowai Bypass bad kaba la pynlong ïa ka um ba kan poi shaduh ïing briew.
Nalorkata, ka um kaba wan na kylleng ki shnat ka la pyndap smam ïa ka jingkieng Myntdu hajan ka sor Jowai.
Shuh shuh ka jingjur jong u slap bad ka lyer ka la wanruh ruh ka jingkhyllem jong ki dieng bah dieng san ha ki surok bad ban ïa ki ïing briew kumjuh ki kali kum ha Pamrakmai, East Jaiñtia Hills District u dieng u la khyllem bad ban ïa kawei ka kali Alto bad ha ophis jong ka tnat Soil and Water Conservation Jowai u dieng ba khyllem u la ban ïa ka Jeep.
Nalorkata, kawei ka kali kamai ka la shah ban na ka jingkhyllem jong u nar bording ha Tourist Stand Indica Jowai-Shillong.
Shuh shuh ha Mynkre, East Jaiñtia Hills ka la don ka jingshlei um ha ki bynta ka surok bah NH 6 bad wanrah ruh ka jingsahkut kali kumjuh ha Lad Brichyrnot ka la don ka jingtwa khyndew.
