Shillong, Jymmang:
Ka jinghap u slap bajur namar ka jinglynshop ka ‘erïong ‘Remal’ ha Bangladesh ka la ktah lang ïa ka Jylla baroh kawei bad ktah ruh ïa ka leit ka wan ki paidbah namar ka dheng kali kaba shyrkhei.
Ka jinghap u slap ka la bteng naduh mynstep bad ka la nang kham jur ha ka por janmiet bad ynda la kham miet.
Ki surok ha nongbah Shillong ki la sdang ban kham kylluid ynda la dap 8 baje janmiet hadien ba ki kali ki la nang lait ban ïaid ha kaba ki nongleit nongwan ki la leit phai sha la ki jong ki ïing.
Ka ‘erïong ‘Remal’ ka la ïaid lynti lyngba ki rud duriaw bad poi sha Bay of Bengal ha kaba ka ‘erïong ka la ktah lang ïa ki bynta jong ka Jylla West Bengal.
Ki surok bad ki nala harud surok ki la shlei namar ka jinghap slap lynter bad bun ki kali kamai ruh ki la sahkut ha ka dheng kali namar bun ki nongleit nongwan ruh ki la sei la ki jong ki kali.
Ki khynnah pule kiba mih ban leit phai sha ïing ynda la wai skul ki la jhieh lut ha lynti wat lada ki pyndonkam ïa ka shatri ban da na u slap.
Ka ïew ka hat ruh ka la kham kynjah namar ki nongleit ïew ruh ki duna namar ka jinghap u slap baroh shisngi.
Ki stad nongïathuh lypa shaphang ka jinglong ka suiñbneng ki la batai ba kane ka jinghap slap kan bteng haduh ka Sngi Ba-ar ka 28 tarik Jymmang wat lada ka ‘erïong ‘Remal’ ka la kham jai-jai ha ki bynta jong ka Bangladesh.
