Khliehriat, Jymmang 29
U Deputy Commissioner (DC) jong ka East Jaiñtia Hills District bad Chairman District Disaster Management Authority, East Jaiñtia Hills District, Khliehriat u la bthah ïa baroh ki waheh shnong hapoh ka District ban phah mih shipor ïa ki trai ïing kiba don ha ki jaka sharing kaba buh jingma na ka twa khyndew bad jur slap hapoh ka District sha ki ïing skul/community hall ka shnong lane sha ki jaka pynkynriah khnang ban lait na kino-kino ki jingjia ba sngewsih.
U la kyrpad ruh ïa baroh ki waheh shnong ba kin pyntip sha ki Block Development Officer (BDO) na ka bynta ki longïing ba la pynsah ha ki ïing skul ne Community Hall ba kin ïoh leh ïa kaba donkam.
Shuh shuh ha kawei pat ka liang, u DC u la ong ba na ka daw ka jingjur jong u slap hapoh ka District, ka Wah Litein kaba don hapoh ka Saipung C&RD Block ka la shlei sha ki jaka ba marjan bad ka la kiew ruh shaduh ka surok PWD. Ha kaba ïadei bad kane, u la kyrpad ïa baroh ki nongshong shnong jong ka District khamtam ki shnong ba don shajan kane ka wah ba kin nym ïaid kai shajan ne khap shiliang kane ka wah kynthup ki kali kat bym pat hiar ka jingshlei um khnang ban lait na kano-kano ka jingsngewsih ïa ki nongshong shnong ne ki nongleit nongwan.
