Shillong, Jymmang 29
Ka Committee on Government Assurances jong ka ïingdorbar thaw-aiñ ka jylla hapoh ka jingïalam jong u Bah Renikton Lyngdoh Tong -khar kum u Chairman ryngkat ki dkhot committee Bah Gabriel Wahlang, MLA bad Bah Matthew B Kurbah, MLA, ha ka Sngi Balang ki la hiar jurip ïa ka Mawmluh Cherra Cements Limited (MCCL) ha Sohra.
Ha kane ka jinghiar jurip na ka liang ka committee ka la ïoh ban ïakren ruh bad ki briew jong kane ka karkhana dewbilat kaba la long trai da ka sorkar kaba la thmu ban khang khyrdep noh.
Ïa kane ka committee la synran lang ruh da ka Managing Director jong ka MCCL, ka WAM Booth, u Chief General Manager ka MCCL, u Bah K Lyngdoh, bad kiwei ki ophisar jong kane ka karkhana.
Ha kane ka jingjurip bad ha ka jingïakren na ka liang jong u Chairman jong ka Committee u Bah Renikton Lyngdoh Tongkhar, u la pynpaw ba kam i don jingkyrmen na ka bynta kane ka karkhana ba kan dang khie im namar kiba bun ki daw kynthup ruh ïa ka jinglut ha ka ban pynïaid ïa kane ka karkhana.
Na ka liang jong ki dkhot ka Committee da kawei ka sur ki la mynjur ban phah ki jingai jingmut sha ka Sorkar ban pynkylla noh ïa kane ka karkhana sha ka Museum bad ruh ïa ki jaka sah (quarter) ban pynkylla sha ka Resort, ka ban plie lad pat ban tyrwa sha ki nongtrei jong ka MCCL ban peit bad pynïaid resort bad museum.
Shuh shuh u la ong ruh da kaba pynkylla ïa kane ka jaka sha ka jaka jngohkai pyrthei, yn lah ban pynmih pisa kham bun.
“Ngi tip ba ka Sorkar ka kwah ban pyndam noh ïa kane ka karkhana bad khang noh shi syndon bad ban pynpra noh ïa ka, hynrei hadien ba ngi la peit bad puson ïa ka jingitynnad jong kane ka jaka bad ki ïing sah jong ka MCCL, nga sngew ba ka long kaba sngewsih ban pynpra ïa ka,” la ong u Chairman.
U dkhot ka committee u Bah Matthew B Kurbah u la phla ba u la don ka jingïadei kaba jan bha bad ka MCCL naduh u snem 1999-2000 bad pynpaw ka jingsngewsih halor ka jingkhang noh jong kane ka karkhana bad ka jingduh kam jong ki nongtrei jong ka. U la sngew ïahap bad ka jingtyrwa jong u Chairman ka Committee uba la ai jingmut ba ïa ka histori jong kane ka karkhana dei ban pynsaphriang sha ki paidbah lyngba ka jingpynkylla sha ka museum, bad ruh ba ki nongtrei kin don bynta ha kaba peit bad pynïaid.
