Shillong, Jymmang 29
Ka KSU hadien ba ka la ïohi lyngba ki lad pathai khubor ha ka Sngi Balang ba ka sorkar ka thmu ban phah pynïasoh noh ïa baroh ki kolej ka jylla sha ka Williamson Sangma State University, ka pynpaw ïa ka jingsngew kyndit namar ka sorkar ka khlem ïathuh eiei, hato ka la dep ïasyllok ne em bad ki nongpynïaid bad samla pule kolej ka jylla halor kane ka rai?
Kane ka rai ka dei kaba ktah ïa ka im ka ïap ki samla pule bad donkam ïa ka sorkar ban ïasyllok shwa bad baroh ki ‘riew paidbah khamtam ki nongpynïaid kolej, ki nonghikai, ki kpa ki kmie, ki samla pule bad ki seng bapher-bapher ha shwa ban shim ïa kum kane ka rai.
Ka sor Shillong ka dei ka nongbah jong ka jylla bad ka KSU ka sngew ba ki bor ba dei khmih bad pynïaid ïa ka pule puthi ki dei ban don ha Shillong ban pynsuk ïa baroh lang.
Ka KSU ka pynkynmaw ïa ka jingjia ha u snem 2005 ha kaba ka la don ka huri-hura kum ka jinglait tuh ki kot jingkylli bad ka jingbym poi ki kot jingkylli (ha sector 1) kaba pynlong ïa ka seng ban dawa Regional Administrative Office jong ka MBOSE ha Shillong kaba la poi haduh u pud jong ka jingïakynad kaba jur ha kaba da ki phew ngut ki samla Khasi kynthup ïa ki dkhot ka KSU ki la shah kem bad mynsaw jur ha ki jingïakhih.
Ka jingwan jong ka Regional Office ka MBOSE ha Shillong ba khlieh da u Executive Director ka la ïarap shibun ïa ki samla ba pule ha ki kolej bapher bapher.
Kyntang ïawai, ka KSU ka pynsngew ba kumba 70% ki kolej ki don ha ka thaiñ Mihngi jong ka jylla kata ha ka Bri U Hynñiewtrep, kan ym ïahap ban ïasoh (affiliate) bad ka skulbah kaba don sha kawei pat ka thaiñ kaba jngai na ka nongbah bad ka sorkar kan hap pynshai paidbah bha haba ka shim kum kine ki rai.
Kane ka long katkum ka kyrwoh na u General Secretary, Khasi Students’ Union, Donald V Thabah.
