Shillong, Jymmang 29
Ka Jylla Meghalaya ka la lait biang na ka Common University Entrance Test (CUET) na bynta ki samla pule Under Graduate (UG) ha kaba ka Sorkar Pdeng lyngba ka tnat pule puthi ka la pyntip sha ka Sorkar Jylla hadien ba u Myntri Rangbah u Conrad K Sangma u la kyrpad bad kren ïa ki bor ba dei khmih ha Delhi.
U Myntri ka tnat pule puthi u Rakkam A Sangma u la pynbna ïa kane ha ka Sngi Balang hadien ba la ïohpdiang ïa ka shithi na ka Sorkar Pdeng ba ka Jylla ka la lait biang na ka CUET (UG).
Haba kren sha ki lad pathai khubor, u Rakkam u la ong ba kito kiba la thoh ïa kane ka eksamin kan nym lehnohei namar ba lada ki pass, bad lada kwah ban leit pule shabar Jylla kan long ka jingmyntoi na ka bynta jong ki.
Ka Sorkar Pdeng lyngba ka tnat pule puthi ka la phah ïa ka shithi ha kaba la pyntip ba la pyllait kyrpang ïa ka Jylla Meghalaya bad Nagaland na ka CUET (UG).
U Rakkam u la ïathuh ba kane ka urlong hadien ba u Myntri Rangbah u Conrad K Sangma u la rah ïa kane ka mat bad kren ha Delhi ban pyllait biang ïa ka Meghalaya na ka CUET na ka bynta ki samla pule Under Graduate.
Haba kylli shaphang ki samla pule kiba la dep ban thoh ïa ka eksamin CUET dang shen la ka NTA kan puroi noh (refund) ne em ïa ka bai eksamin, u Rakkam u la ong ba kito kiba la dep ban ïakhun ïa kane ka eksamin bad kito kiba pass bad kham heh ki marks ki ïoh ruh ka lad ban leit wad jaka pule shabar Jylla ha kaba ki donkam beit ban pass ïa ka CUET ban ïoh leit pule khamtam ha ki jaka pule kiba pynïasoh bad ki skulbah lane University kiba peit ba khmih da ka Sorkar Pdeng.
U la ong ba ban puroi noh ïa ka pisa kaba la siew na ka bynta Bai thoh eksamin CUET ym pat lah ban ong hynrei ïa kane, ka Sorkar Jylla kan dang ïakren bad ki bor ba dei khmih ha Delhi.
Ha kajuh ka por une u Myntri ka tnat pule puthi ka Jylla u la kyntu ruh ïa ki samla pule ba kin long kiba la pynkhreh nangne shakhmat da kaba ong ba ka CUET kam dei ban long ka jingtieng ïa ki samla hynrei dei ban don ka mynsiem ïakhun ha kane ka pyrthei kaba jur bha ka jingïakop.
U la ong ong ruh ba ka Sorkar Jylla kan ïakren bad ki bor ba dei khmih ka National Testing Agency (NTA) ban pyntikna ban ym mih jingeh shuh ha ki por ban sa wan ynda la pynlong ïa ka CUET namar ki don bun ki samla pule Under Graduate kiba khlem pynrung kyrteng ïalade ban ïakhun ïa ka CUET ha kane ka sien kaba mynta.
Kum ban pynkynmaw, ka jingpynlong ïa ka eksamin CUET (UG) ha Meghalaya kam long kaba ïaid beit namar ka NTA kam shym la pynbiang bha ïa ka rukom pynkhreh naduh ka jingbuh ïa ki jaka thoh eksamin bad ka jingbym biang ki briew ban pynïaid ïa ka eksamin.
Ki don khyndiat hajar ngut ki samla pule Under Graduate kiba la pynrung kyrteng bad thoh ïa ka eksamin CUET hynrei ki dang don ruh da ki phew hajar ngut ki samla pule kiba khlem pynrung kyrteng ïalade na ka bynta ban thoh ïa kane ka eksamin.
