Shillong, Jymmang 29
Ka mat ïakren halor ka jingsniew jong u drok bad ka jingkyrni ki khynnah samla ha une u jait jingdih ba sniew ka la long ka mat kaba baroh ki paidbah la ka long na ka liang ki sengbhalang, ki nongmikhmat, ki kynhun riewngeit bad kiwei-kiwei ba kin ïakren sharum-shaneng namar ka jingngop ki khun samla ka jylla ha ka jingdih ïa u drok ka la long kaba shyrkhei haduh katta-katta.
Halor kane ka bynta, haba ïoh ban ïakren bad u Bah Kynphamlin V. Kharlyngdoh, u President ka South West District Congress Committee, u la pynpaw ba ka jingjyllei jong u drok hapoh ka thaiñ Mawkyrwat bad ha baroh kawei ka distrik ka la long kaba sngewkhia haduh katta-katta bad ka jingngop jong ki khynnah samla ka la nang buh jingma shuh-shuh ïa ka imlang-sahlang bad khamtam eh na ka bynta ka lawei ka ban sa wan.
U Bah Kharlyngdoh u la pynpaw pat ïa ka jingsngewkmen halor ka jingkhot jingïalang jong u MLA ka Mawkyrwat Constituency, u Bah Renikton Lyngdoh Tongkhar ban ïatai bad ai jingmut halor ka jingjyllei jong u drok hapoh ka thaiñ Mawkyrwat baroh kawei ha kaba ha katei ka jingïalang yn don bynta lang da baroh ki nongmihkhmat ka thaiñ, ki ‘riew rangbah, ki nongïalam, ki longkmie-longkpa, ki nongïalam sengbhalang bad ki khun samla ka ban sa long ha ka 1 tarik u bnai Jylliew 2024 ha ka por 12 baje mynsngi ha ka Dorbar Hall jong ka Mawkyrwat.
U Bah Kharlyngdoh u la ong ba na ka liang ka seng Congress ka kwah ban ïasnoh kti lang bad ban don bynta ha katei ka jingïalang namar kane ka dei mat bad ka jingsngewkhia kaba baroh ki paidbah ka thaiñ ki don.
U Bah Kharlyngdoh u la ong ba ïa ka daw ka jingjyllei jong u drok hapoh ka thaiñ Mawkyrwat ym lah satia ban ong hynrei na ka liang jong ki bor pynïaid distrik, ki nongïalam shnong, ki pulit, ki nongïalam sengbhalang ki la ïaleh bad trei shitom na ka por sha ka por ban khynra bad rat dyngkhong ïa utei u jingdih pynbuaid napoh ka thaiñ.
“Na kata ka daw ngi donkam ban ïa phylliew jingmut, ban ïa pyrkhat ryngkat-ryngkat bad ngi hap ban wad ruh na kano ka daw bad ngi hap ban wad ruh ha kano ka rukom ba ngin ïaleh katba lah ban tehlakam lym kumta ka jingma kam dei ka jingtied jingkhang ïa ka ïing jong kiwei hynrei ki jingkhang jong ngi ruh mynta ki sdang ban tied”, la ong u Bah Kharlyngdoh.
Shuh shuh u Bah Kharlyngdoh u la ong ba ha ki por kiba mynshwa ki ju ong ba u drok u don tang hapoh sor Shillong hynrei ha kane ka por kaba mynta pat la ïohi ba u drok u la rung wat ha man la ki jaka bad wat ha ki thaiñ nongkyndong ruh.
“Une u drok mynta u la long ka jingma kaba khraw na ka bynta ki samla bad ka jingngop kine ki samla ngim tip na ka daw aïu”, la bynrap u Bah Kharlyngdoh.
U Bah Kharlyngdoh u la kyntu ïa baroh ki ‘riew rangbah, ki nongïalam sengbhalang, ki seng longkmie, ki seng samla bad kumjuh ruh ïa ki seng saiñ-pyrthei kiba don ïa kajuh ka jingsngew bad kajuh ka jingsngewkhia halor u drok ba kin wan ban ïasnoh kti lang bad don ryngkat ha katei ka jingïalang ha katei ka sngi.
