Shillong, Jymmang:
Hadien ba ka tnat pule puthi ka sorkar pdeng ha ka 29 tarik u Jymmang 2024 ka la pynbna ba ïa ka jylla Meghalaya bad ka Nagaland la pyllait noh na ka eksam Common University Entrance Test (CUET), 2024, na ka liang ka Hynñiewtrep Integrated Territorial Organisation (HITO) Sengkmie ka la pynpaw ïa ka jingaikhublei lyngba ka shithi ba la phah sha u Myntri Rangbah ka jylla, u Conrad K Sangma halor ka jingshim khia jong ka sorkar MDA ban pyllait ïa ka jylla na kane ka eksamin CUET.
Ha katei ka shithi ba la phah sha u Myntri Rangbah ka jylla, u Conrad K Sangma, ka seng ka la ong ba na ka liang ka seng HITO ka kwah ban pynpaw ïa ka jingai khublei sha ka sorkar kaba la shimkhia ban pyllait ïa ka jylla Meghalaya na kane ka eksamin CUET na ka bynta u snem 2024 kaba long ka jingmyntoi na ka bynta ki khun samla ka jylla namar ka jingpynlong ïa kane ka eksamin dang shen ka la ktah shikatdei eh ïa ki samla pule ha kaba ki la don shibun ki jingeh bad ki jingjynjar na ka daw ka jingbymlah jong ka National Testing Agency (NTA) ban pynkhreh bad ban pynbit pynbiang bha ïa ki jingdonkam haba ka pynlong ïa katei ka eksamin.
Ka seng ka la ong ba ka jingshim rai ban pyllait ïa ka jylla na ka eksamin CUET ka la long ka jingkyrkhu ïa ki khun samla ka jylla kiba la ïai ap khmih lynti ban lait na kane ka jingshah pynsohsat.
Shuh shuh ka seng ka la kyrpad ruh ïa ka sorkar ba kan bthah ïa ki tnat kiba dei khmih ba kin pynbit pynbiang bad ban pynkhreh bha na ka bynta ka eksamin CUET ka ban sa long pat ha u snem ba bud kata ha u snem 2025 khnang ba ki khynnah pule kiba dei ban ïaleh ïa kane ka eksam kin nym mad satia ïa kijuh ki jingeh bad ki jingkulmar kiba ki la dep ban mad ha ka por ba ki ïaleh ïa kane ka eksamin CUET kaba dang shu dep shen.
