Shillong, Jymmang 30
Ha ka jingbteng jong ka Hynñiewtrep Youths’ Council (HYC) ban pynlong ïa ka jingkhynra drok ha kylleng ki jaka bad ki distrik kiba la jyllei ha ka jingkynrei u drok, ka seng ha ka Sngi Palei ka la ïoh ban ring dur ïa uwei khynnah bar jylla katba u dang muja ban injek drok ha Mawbah bad ka seng ka la kem noh shisyndon ïa utei u briew.
Ka seng HYC ha ka jingkhynra drok ka la ïoh ban kem ïa kumba 10 ngut ki khynnah dih drok kiba kynthup ïa ki Khasi bad bar jylla kum na Mawbah, Them Ïewmawlong bad Garikhana ha kaba ka seng ka la ïoh ruh ban kurup shibun tylli ki thyrnia injek drok.
Na ka liang ka seng ka la thang noh ïa u drok, ki thyrnia injek drok kiba la ïoh kurup na kitei ki khynnah bad ka la ïasyllok ruh bad kitei ki samla Khasi kiba la shah kem da kaba phah wan ïa ki sha ophis treikam jong ka seng ha ryngkat ki kmie ki kpa bad bahaïing hasem jong ki.
Haba kren sha ki lad pathai khubor, na ka liang u Vice President ka seng, u Bah Donboklang Kharlyngdoh u la ong ba kumba ka seng ka la pynbna ba naduh ka 2 tarik u bnai Jymmang 2024 ba kan dei ka thma ban ïaleh pyrshah ïa u drok, bad halor kata ka seng ka la ïai ïakhun tyngeh tad haduh kine ki sngi ban pynlong ïa kane ka jingkhynra drok.
U Bah Donboklang u la ong ba ha katei ka jingkhynra drok wat la ki la don shibun ki diengpyngkiang bad ki jingtynjuh ha kaba na ka liang ka tnad pulit jong ka thanat Sadar haba ka la khot hajir ïa u ha ka step jong katei kajuh ka sngi halor ka jingleit pynpra jong ka seng ïa ki ïing jong ki briew kiba sah beaiñ ha Lum Survey, hynrei na ka liang ka tnad pulit ha katei ka sngi ka la poi pynban ban ïakren halor ka jingkhynra drok jong ka seng.
“Na ka liang jong ngi kumba ngi la dep kren shai ba ngin ïai ïakhun bad ngin ïai ïaleh khlem jingsangeh”, la ong u Bah Donboklang.
Shuh shuh u Bah Donboklang u la ong ba ka seng ka kwah ba ki nongdih drok kin duna noh nangne shakhmat namar ka jingma kaba ap ka long ba lada ki paidbah ki ïaid marwei ha lynti syngkien, kitei ki nongdih drok kin shu pynap da ki tiar pynmynsaw bad kin lute kaba lah ban ïalam wat shaduh u pud ka jingshim ïa ka jingim jong ki briew.
U Bah Donboklang u la kyrpad ruh ïa ki paidbah ba kim dei satia ban thied ïa kino-kino ki tiar ki tar kiba wan die ha ki tyngkong ïing ha ka dor kaba tad namar ki nongdih drok ki ju leit tuh na kylleng ki jaka bad die pat ha ka dor kaba tad tang ban ïoh pisa ban thied drok.
“Lada phi thied ka mut phi ai mynsiem ba u drok un nang kynrei hapoh ka Bri u Hynñiewtrep jong ngi, te da kaba sngewkhia nga kyntu ïa baroh ki para ri ne ki longkmie-longkpa ba kin sngewbha ba lada don kine ki briew kiba wan die tad dor ïa ki mar ki mata ba kim dei ban thied”, la ong u Bah Donboklang.
