Shillong, Jymmang 30
Saw ngut ki briew, kynthup ïa lai ngut na kajuh ka ïing, ki la khlad noh ha ka shnong Nongpriang kaba don ha ka thaiñ Sohra hadien ba ar tylli ki ïing ki la julor na ka jingtwa khyndew.
Katkum ka khubor ba la ïohlum, katei ka la jia ha ka por 2 baje mynstep jong ka Sngi Palei katba kiba shong ba sah ha kitei ki ïing ki dang ïohthiah.
Na ka liang ki katto katne ngut ki nongshong shnong ka Nongpriang ki la ïathuh ba ka jingtwa khyndew ka la sdang shwa ha ka ïing ba shong ba sah u Bah Bisa Nongrum, 75 snem ka rta. Ki la ong ba une u rangbah u la don tang marwei ha la ïing ha ka por ba ka khyndew kaba twa ka la pynjulor. Une u rangbah u la khlad noh ha kane ka jingjia.
Hadien kata, ki la ong ba ka jingtwa khyndew ka la leit jia sa ha kawei pat ka ïing ka sem kaba la shong la sah da u Bah Kynmaw Syngai, 70 snem, i kurim jong u, Kong Benti Riahtam, 60 snem, bad u khun jong ki uba dang samla, u Lumlang Riahtam. Kine baroh lai ngut ki la don hapoh ïing ha ka por ba jia kane ka jingtwa bad ki la duh noh ïa la ka jingim.
Shuh shuh la ong ba kiwei pat ki khun ki kti jong ka longïing longsem u Bah Syngai ki khlem don ha ïing ha katei ka por namar ki dei kiba leit skul ha Sohra bad Shillong.
Mar ïa ïoh jingtip halor katei ka jingjia, ki para shnong para thaw ki la ai jingtip sha ki pulit bad ki bor ba dei khmih ka Sohra Civil Sub-Division. Na ka liang ki pulit na Sohra ha ryngkat ka Search & Rescue Team (SRT) na Shillong ki la leit sha katei ka shnong ban ïoh sei ïa kitei ki saw ngut. Ban poi sha ka shnong Nongpriang, hap ban ïaid kjat kumba shi kynta tam na Sohra.
Hynrei ka khubor ba la ïohlum ka ïathuh ba haduh kane ka khyllipmat, namar ka jingtwa khyndew ka la kham jur, la lah ban sei shwa tang ïa ar ngut kiba la duh noh ïa la jingim.
Mynta ka miet, la pynsangeh shwa ïa ka jingwad sa ïa ki ar ngut kiba dang sahkut na ka jingban jong ka twa, bad ki pulit, SRT bad ki paidbah kin sa bteng biang ha ka step Sngi Thohdieng ïa ka kam.
Haba pynpaw ïa ka jingsngewsih halor katei ka jingjia bad ka jingduh noh ïa saw ngut ki mynsiem briew, u Myntri Rangbah, u Conrad K Sangma, u la ong ba la dep ban ai jingbthah ïa ki bor ba dei khmih ba kin pyllait noh mardor ïa ka jingsiew sha ki bahaïing hasem jong kitei ki saw ngut kiba la khlad.
