Shillong, Jymmang:
Ka jingkhyllem dieng kiba heh ha ki bynta ka sor Shillong ka la pynlong ïa ki pulit ba kin khang ban rung ïa ki kali naduh Hotel Orchid Annex Polo shaduh jaka sah u Chief Secretary namar ka jingkhyllem u dieng ba heh hajan jaka sah u Chief justice.
Kine ki dieng kiba la khyllem hapdeng surok ka dei ruh ha Golflink namar ki pulit ki la khang ban ïaid na Polo hynrei la phah ïaid sha Lawmali.
Nangta u diengkseh baheh uba ïeng hajan Lum Jingshai kaba dang hap ha ka shlem treikam ka MeECL u la kyllon hapdeng surok bad kane ka la pynsyier ïa ki kali kiba leit bad wan na Mawlai sha Polo.
Ka jingkhyllem kine ki dieng ka dei ha ka por mynstep jong ka Sngi Balang namar ka jingther u slap bad beh ka lyer ha ka Sngi Ba ar.
La ïohi ba ki nongtrei ki la leit ban pom noh ïa ki dieng naduh dangstep haduh ka por 10 baje mynstep ban pyllait ïaid ïa ki kali.
La ïohi ruh ba ka jingkhang lynti ban ïaid na Orchid Hotel sha jaka sah u Chief Justice ka la pynsahkut kali kham jur na Nan Polok shaduh Polo namar baroh ki kali ki la ïaid lang najuh ka lynti.
