Shillong, Jymmang:
U Returning Officer (RO) ka 1-Shillong Parliamentary konstitwensi, uba long ruh u Deputy Commissioner ka East Khasi Hills, u S.C. Sadhu, ha ka Sngi Balang u la leit jurip ïa ka jaka ñiew ‘vote’ ha Madan Polo ban khmih bniah ïa ki lad jingpynkhreh kiba la pynbit-pynbiang na bynta ka sngi ñiew ‘vote’ ha ka 4 tarik u Jylliew.
“Ka jingwan jurip mynta ka sngi ka long ban batai kam sha baroh ki ARO lem bad kiwei-kiwei, kum ki lad pathai khubor, pulit, CAPF kiba pahara ïa ki ‘Strong Room’ ha ka jaka ñiew ‘vote’ halor ki lad jingpynkhreh bapher-bapher kiba ngi la pynbiang” la ong u Sadhu haba kren sha ki lad pathai khubor.
U la ong ruh ba ki bor pynïaid ki la pynbit-pynbiang ïa ki jingpynkhreh kiba bniah haba ïadei bad ka sngi ñiew ‘vote’ na bynta ka jingïaid beit ïaid ryntih ban ñiew ïa ki ‘vote’ na ki kor EVM bad ‘Postal Ballot’.
U la ïathuh ba ka jingñiew ‘vote’ na bynta baroh 7 distrik jong kane ka konstitwensi kan long ha kane ka jaka.
U RO u la ong ruh ba ki bor pynïaid ki la pynbiang ïa ki jingpynkhreh ba bniah na bynta ka shongsuk-shongsaiñ khnang ba kan ym mih kano-kano ka jingjia ha ka jaka ñiew ‘vote’, kumjuh ban pyntikna ba yn shah tang ïa kiba ïoh jingbit ban rung ha ka jaka ñiew ‘vote’.
“Ka don ruh la ka jong ka ‘Media Cell’ kaba la thaw – ngi la batai ïa ki lad pathai khubor khnang ba ki lah ban ïoh ïa ki jingtip kiba kloi bad ba tikna bad ba ka jingïasam jingtip kan long kaba bteng bad ha ka rukom kaba khuid-suba,” u la ong.
Nalor kane, u la ong ba yn sa pynïeng ruh la ka jong ka ‘Screen’ na bynta ki lad pathai khubor bad haduh hangne, yn shah ïa ki ban rah ‘mobile’ khnang ba kin ïoh phah ïa ki jingtip jong ki.
Haba kylli, u la ong, “Ki don ki pulit CAPF, hynrei ïa ka bynta ba shabar, ki don ki pulit ka Jylla ban pahara.”
Shuh shuh u RO u la bynrap ba la pynkhreh ruh ïa ki jaka ïeng kali ha katei ka sngi.
Nalor ki ARO, ha kane ka sngi, la synran lang ïa u RO da u Superintendent of Police ka East Khasi Hills, u Rituraj Ravi lem bad kiwei-kiwei ki ophisar Sorkar.
