Shillong, Jymmang 30
Ka Sorkar Jylla lyngba ka tnat pule puthi ka la nang pynkhreh ban pyntreikam noh ïa ka skulbah jong ka Jylla, ka Captain Williamson Sangma State University ha kaba ki kolej kiba pynïaid da ka Sorkar Jylla ha kane ka Jylla kin pynïasoh noh bad kane ka skulbah, bad kiwei pat ki kolej shimet ruh ki lah ban pynïasoh bad kane ka skulbah lada ki kwah.
U Commissioner and Secretary ka tnat pule puthi, u Syed M Razi, haba kren sha ki lad pathai khubor u la ong ba ka Sorkar Jylla ka la nang pynbit pynbiang ïa ki jingdonkam kiba dei ban bud ryntih na ka bynta ban treikam noh ka skulbah jong ka Jylla.
U la ong ba wat lada ki samla pule (under graduate) ka Jylla ki la tip ba naduh mynta u snem la donkam ban thoh ïa ka eksamin Common University Entrance Test (CUET) na ka bynta ban shahjied ban leit pule ha ki kolej kiba pynïasoh bad ka skulbah NEHU, hynrei ki don bun hajar ngut ki samla pule kiba khlem pynrung kyrteng ïalade na ka bynta ka eksamin CUET (UG), 2024.
U la ong ba wat kito kiba la dep pynrung kyrteng ki khlem leit thoh ïa ka eksamin CUET bad ki don ruh ki samla pule kiba leit thoh tangba ki khlem leit thoh lut ïa ki sobjek kiba dei beit ban pyndep.
Nalorkata, u la ong ba ka jingbymbiang ka rukom pynïaid ïa ka jaka thoh eksamin CUET (UG) ha NEHU ka la poi sha ka jingtip jong u Myntri Rangbah bad kane ka la pynlong ïa ka Jylla ban kyrpad biang ïa ka Sorkar Pdeng ban pyllait ïa ka Jylla na ka CUET mynta u snem 2024.
U Razi u la ong ba ha ka jingshisha, ka Sorkar Jylla ka la ïarap ban pynbiang ïa ki jaka thoh eksamin CUET hynrei dei ka National Testing Agency (NTA) kaba pynkylla ïa ki jaka thoh eksamin khlem da pyntip lang ïa ka Sorkar Jylla khamtam ïa ka tnat pule puthi kaba la dep thung ruh ïa u ophisar ban ïarap peit lang ïa kane na ka bynta ka jingïaid beit ka eksamin.
Hynrei u Razi u la ong ba ha u snem ban wan, ki kolej kiba pynïasoh bad ka skulbah jong ka Jylla kim donkam shuh ïa ka CUET, hynrei na ka bynta ki samla pule kiba kwah ban leit pule shabar Jylla ki hap ban ïakhun beit ïa ka CUET.
U la pynshai ba hadien ba la pyllait ïa ka Meghalaya na ka CUET, ka jingpynrung ha ki kolej kiba pynïasoh bad ka NEHU kim donkam shuh ban pyni ïa ka jingïoh marks ha ka CUET hynrei yn pdiang katkum ki marks kiba ïoh ha ka eksamin bad pynlong da ka Board kumba ju leh ha ki por ba la leit.
