Shillong, Jymmang 30
Kum shi bynta ban tehlakam ïa ki kam khaïi tuh ïa ki mrad ki mreng bad ki dkhot met jong ki mrad kumjuh pyrshah ïa ki bor kiba ktah ïa ki jingthung-jingtep bad ki mrad ki mreng lem bad kito kiba pynjot ïa ka mariang, ka tnad Customs ha ka 29 tarik mynta u bnai ka la kurup 27.992 kilo ka bniat hati (ivory).
Ha kaba ïadei bad kane, uwei u briew u la shah kem.
Hadien ba la ïoh ïa ki jingtip kiba tikna halor ka jingkhaïi be-aiñ ïa ka bniat hati, ki ophisar ka tnat Customs (Preventive) HQ, Shillong ki la leit mar-mar sha Biswanath Chariali, Assam bad ha ka jingpynap shrip, ki la ïoh bat ïa uwei u briew bad na u, la kurup noh ïa saw tylli ki bniat hati (Indian (Asian) Elephant (Elephas Maximus)) ba la dep ot bad kiba khia 27.992 kilo.
Ïa ka bniat hati la buh ha ka thup ‘Schedule I’ jong ka Wildlife Protection Act (WLPA), 1972 bad ïa kitei ki mar la kurup hapoh ka kyndon 50 jong ka WLPA, 1972 (as amended) ha ka 29 tarik mynta u bnai bad la aiti noh ïa ki sha ki bor pynïaid ka tnad Wildlife.
Ka tnad Customs ka ai jingïaroh ïa ka jingïatreilang bad jingkyrshan jong ki pulit Biswanath bad bor khlaw haba ïadei bad kane ka kam.
Lyngba ka jingwanrah jingkylla ba dang shen ha ka Wildlife Protection Act kaba treikam naduh ka 1 tarik Ïaïong, 2023, ki ophisar ka tnad ki la nang ïoh bor ban tehlakam ïa ki kam khaïi be-aiñ ïa ki mrad ki mreng. Namar kine ki kyndon bathymmai, ki ophisar ka tnad Customs ki la nang trei shit rhem shuh-shuh ban ïoh pynsangeh ïa ki kam be-aiñ haba ïadei bad ka jingkhaïi tuh ïa ki tiar ba ïadei bad ki mrad.
Ha kane ka shisnem ba la dep, ka Commissionerate of Customs (Preventive), NER ka la ïoh kurup ïa 3 tylli ki ‘Pangolin Scale’ kiba khia 68.87 kilo, 11.536 kilo ka Ambergris (Whale Vomit), 360 kilo ka bniat hati, nalor ki jingkurup kum ki ‘Hornbill’, ‘Flame Bowerbird’ bad i khun tngaw ‘Orangutan’, ïa kiba la ïoh jingïada hapoh ka CITES kumjuh na ka Wildlife Protection Act, 1972, ha ki jingkhynra ha Meghalaya, Mizoram bad Assam.
Shuh shuh ka tnat Customs ka minot ha ka ban tehlakam ïa ki kam be-aiñ haba ïadei bad ki mrad ki mreng ba kynthup ïa ki kam be-aiñ sha shiliang kum ka jingkhaïi tuh da ka jingthmu ban ïatreilang ryngkat kiwei-kiwei ki tnad treikam ba ïadei bad ka aiñ.
