Shillong, Jymmang 30
U Vice-President jong ka Hynñiewtrep Youths’ Council (HYC), Bah Donboklang Kharlyngdoh, u la ong ba ka jingkhot sha patok ka donkam ïa u ‘riew ieid ri ban pdiang namar kane ka jingshah khot hajir ki pulit ka long kumba pynthymmai ïa ka laisen ïaid jaidbynriew man uwei u dkhot dap shynrang.
U Bah Donboklang u la pynpaw ïa kane haba u ïakren bad ki nongthoh khubor hadien ba u la dep ai jubab hakhmat u Investigation Officer (IO) ka thanat Sadar kaba la long ha ka Sngi Palei ha ka jingsynran lang u President ka sengkmie Bah Roykupar Synrem ryngkat ki dkhot.
U Bah Donboklang u la rung sha thanat Sadar ha ka por 1 baje nohphai sngi bad ka la shim por haduh ar kynta duna eiei ban ai jubab hakhmat u Investigation Officer (IO) halor ka jingjia ha Lum Survey bad ka jingkem ïa ki nongpyndonkam drok.
U la buh jingkylli ruh hato leh be-aiñ ki briew kiba shong be-aiñ ha jaka kiwei ne leh be-aiñ kiba leit pynkhuid ïa kiba shong be-aiñ? U paidbah ka Bri u Hynñiewtrep u la tip, la kynnoh ba ka HYC ka leh be-aiñ, la bynrap u Bah Donboklang.
Nalor nangta, u la buh jingkylli hato long be-aiñ kiba thmu ban rat dyngkhong ïa u drok ne long be-aiñ kiba thmu ban khot biang ïa kiba na Assam ban wanrah khaïi drok sha Lum Survey?
“Dang lah shah khot be-aiñ haba ngi ieid jaidbynbriew ban ïa kiba bat aiñ kiba arsap” u la ong.
U la ong biang ngim sngewpher ka jingkhot sha thanat ne sha patok nga sngew ba uwei-pa-uwei donkam ban pdiang ïa kane, namar long thik kumba pynthymmai ïa ka laisen ieid jaidbynriew.
“Nga la wan pynthymmai ïa ka laisen ban pyni ba nga dang ieid ne em ïa ka jaidbynriew namar naduh 2020,2022 bad mynta u snem 2024 nga la shah khot hajir ha ki pulit bad nga ngeit ha u snem 2026 ki pulit kin sa khot biang ïa nga ban pynthymmai ïa ka laisen” u la ong.
Shuh shuh u la ong ba u pdiang beit lada shah khot be-aiñ namar um kwah ban ieid ri da kaba buaid tanglang ka ban ktah ïa ka jaidbynriew.
U Bah Donboklang u la ïathuh ba ka jingkhynra ka seng ïa kiba dik drok hadien ba la lap la ïalam ïa kiba ïoh dik drok lyngba ka jingïatreilang bad ki kmie ki kpa sha jaka ai jinghikai namar ki kmie ki kpa ki don jingngeit ha ka seng HYC.
Katba u President ka HYC u Bah Roykupar Synrem, u la ong ba ka jingleit ki dkhot ka seng ha Lum Survey ha ka 23 tarik Jymmang 2024 ka long ban leit kem ïa ki nongkhaïi drok kiba la wanphai biang.
U la ïathuh ba ynda ki dkhot ka seng ki la poi ha Lum Survey haba kim don shuh kita ki briew kiba khaïi drok, ki dkhot ka seng ki la pynpra noh ïa ka ïing ba ki sah haba ym don briew shuh.
Na ka liang u Bah Roykupar bad u Secretary ka seng kin sa leit ai jubab lashai ka sngi ka 31 tarik Jymmang namar ki la shah khot hajir ha ki pulit ka thanat Sadar halor kajuh ka jingshah kynnoh ïa u Bah Donboklang Kharlyngdoh.
