Shillong, Jymmang 30
Ka Standing Committee jong ka National Board for Wildlife (NBWL) kaba hap hapoh ka tnat kaba peit ïa ki khlaw bad jingkylla ka suiñbneng ka Sorkar Pdeng, ka la mynjur ban shah shna pynheh ïa ka surok Ranikor-Maheshkhola-Baghmara ha kaba ka don ruh ka bynta jong kane ka surok kaba hap ïaid lyngba ka Balpakram National Park (BNP).
Kane ka surok ka dei kaba la don lypa naduh mynshwa hynrei mynta la mang pisa ban pynheh na ka bynta ban ngiam ar tylli ki kali bad ïa kane ka projek ban pynheh surok la mang lyngba ka SARDPNE ‘Phase-A’.
Ha u kyrwoh khubor ba la phah da ka Sorkar lyngba ka tnat PWD (Roads) la ong ba ka bynta jong kane ka surok na Maheshkhola sha Kanai ka dei kaba hap ïaid lyngba ka tduh jong ka Balpakram National Park ha kaba la donkam ban pan jingbit bad ïoh jingmynjur katkum ki kyndon hapoh ka aiñ Forest Conservation Act, 1980 bad Wildlife Protection Act, 1972.
Khnang ban pyntikna ba ka don ka jingïada bad ban peit ïa ki mrad khlaw kiba shong ba sah ha khlaw, ka kyndon ka ong ba wat lada kano-kano ka surok kaba la don lypa, lada donkam ban shna pynheh bad haba ka hap hapoh kano-kano ka bynta jong ka National Park/Wildlife Sanctuary, dei ban da ïoh jingmynjur shwa na ka Standing Committee jong ka National Board of Wildlife (NBWL).
Kumta ïa ka jingkyrpad bad jingpan jingbit ka NHIDCL la pdiang halor ka nongrim jong ka jingmynjur ka Standing Committee jong ka National Board for Wildlife (NBWL) kaba hap hapoh ka Ministry of Environment and Forest and Climate Change jong ka Sorkar Pdeng hadien ba la bud ïa ka rukom kaba dei ban bud.
Namar kata, la ong ba kane ka jingai jingmynjur jong ka tnat ka dei katkum ki kyndon kiba la buh da ka NBWL bad kiwei pat ki bor ba dei khmih ka Sorkar Jylla khnang ban pyntikna ba kano-kano kaba leh kan duna ka jingktah ïa ki jingthaw kiba im bad don ha khlaw bah.
Shuh shuh la pynshai ba ka jingai jingbit kaba la ïoh da ka NHIDCL na ka bynta kane ka projek kaba hap lang ha ka bynta jong ka Balpakram National Park ka dei kaba la bud pyrkhing bha katkum ki kyndon jong ka aiñ Wildlife Protection Act, 1972 (as amended) bad ruh katkum ki hukum jong ka Ïingbishar haba ïadei bad kane.
“Kumta la pynshai biang ba kane ka projek ka dei na ka bynta ban kyntiew kyrdan ïa kane ka surok kaba la don lypa da kaba bud ïa ki kyndon bad jingpyrkhing. Kane ka surok ka dei kaba donkam eh na ka bynta ban biang ka jingpynïasoh hapdeng ki thaiñ kiba don hapoh ka Jylla bad ka jingpynheh ïa ka surok ka dei kaba donkam shisha haduh katta katta,” la bynrap u kyrwoh na ka tnat PWD (Roads).
