Mawkyrwat, Jymmang 30
Ka ‘erïong ryngkat bad u slap bajur ha ka 29 tarik u Jymmang ka la ïoh ban rat naphang ïa 15 tylli ki skul ha Ranikor Block bad 2 tylli ha Mawkyrwat Block.
Katkum ka jingïoh jingtip na ka District Disaster Management Authority la ïathuh ba kine ki skul kiba la shah pynjulor ha ka ‘erïong ki long ka Arlad LP School, Nongmalang RCLP School , Nongmalang RCUP School, St.John RCLP Mawpyllun, Nongnah RCLP School, Nongnah Deposit UP School, Nongnah Secondary school, Khatphra SSA UP school, Nongbah Jynrin LP school, Nongbah Jynrin SSA UP School, Chitogre SSA UP School, Nongmluh COG UP School, RCLP Schhool Phlangdiloin, Saw shnong UP School, Mawphansaw, St peter UP School Borsora, Nonglang RCLP School bad ka Shaid Shaid Umoid.
Ki tyllong khubor na ka DDMA, SWKHD ki ïathuh ruh ba ha ka 30 tarik u Jymmang 2024 ka ‘erïong kaba jur ka la rat naphang sa ïa ki 28 tylli ki ïing kiba hap hapoh ka Ranikor C&RD Block ha kaba ka la don ka jingshah lied jong ki tnum bad shah ban ha ki dieng. Ha Mawkyrwat Block kawei ka ïing ka la julor namar ka jingtwa khyndew bad ha katei ka jingjia 152 ngut ki briew ki la shah ktah bad ki shnong kiba kham shah ktah jur ki long ka Old Moilam, Lower Puksora, Panchering B, Munai bad Mawhaiti.
Shuh shuh la ïathuh ba ka la don ka jingshah pom pyrthat jong 3 ngut ki briew ha kaba ki la mynsaw bad ka la don ruh ka jingshah pynjulor jong ka CHC Ranikor.
Na ka liang ki bor distrik bad ka DDMA mar ïa ïoh jingtip ki la leit ban noh jingïarap wut-wut ïa ki briew kiba mynsaw bad leit ai jingïarap ruh ïa ki ïing bad ki skul kiba la shah pynjulor ha ka bor jong ka mariang.
