Shillong, Jymmang 30
Ka Khun Hynñiewtrep National Awakening Movement (KHNAM) ha u kyrwoh ba la phah lyngba u Working President ka seng, Bah Thomas Passah, ka pynpaw ïa ka jingpyrshah kaba jur halor ka jingpynbna ba kynsan-kynsan jong ka sorkar jylla ban pynïasoh noh ïa baroh ki kolej bad ka State University bathymmai, ka Captain Williamson State University kaba don ha West Garo Hills District.
Ka KHNAM ka la ong ba ka jingpynbna syndet jong ka sorkar ïa kane ka rai ka la pynlyngngoh ïa kiba bun, khamtam ki samla pule namar ha ka jingshisha ka sorkar ka la dei ban ïasyllok shwa ïa kane ka jingthmu bad baroh lang ym ban shu leh ïa kane ka kam tang shimet.
“Kane ka dei ka jingthombor jong ka sorkar. Kum kine ki rai kiba ktah ïa u paidbah ka sorkar ka la dei ban pyntip bad ïasyllok shwa bad ki paidbah. Kumba ka paw, hato kane ka rai la shim tang da u Myntri Rangbah ka jylla ne la ïasyllok bad kiwei ki Myntri Sorkar? Bad kiwei ki seng saiñ pyrthei kiba don bynta bad ka MDA-2 kin hap ban jubab ïa kane”, la ong u kyrwoh.
Ka seng ka la ong ba ka jaka kaba biang eh ka dei ka nongbah Shillong kaba long pdeng ïa baroh bad kan pynsuk ruh ïa ki samla pule jong ka jylla hi baroh kawei. Hynrei kane ka jingleh jong ka sorkar ka pynsheptieng ïoh ka don eiei sha lyndet kiba ka seng NPP ka thmu.
