Shillong, Jymmang 30
Hadien ar snem duna, ka Central Bureau of Investigation (CBI) ka la pynrung ïa ki FIR (First Information Report) ha kaba ïadei bad ka jingïap jong hynriew ngut ki briew ha Mukroh, West Jaiñtia Hills ha ka 22 tarik Naiwieng, 2022.
Katkum ka jingtip ba la ïohlum na ka ‘website’ jong ka CBI, ki don saw tylli ki FIR kiba la pynrung ha kaba ïadei bad ka jingjia ha Mukroh, bad ïa kine ki FIR la pynrung ha ka 28 bad 29 tarik Jymmang.
Kum ban shu pynkynmaw, san ngut ki ‘riew rangbah na ka shnong Mukroh bad uwei u Forest Guard jong ka Assam ki la khlad na ka jingsiat pathar ki nongtrei ka tnat khlaw bad ki pulit jong ka Assam kaba la jia ha ka 22 tarik Naiwieng, 2022.
Ka jingpynrung ka CBI ïa kitei ki FIR ka long hadien ba ka sorkar Assam bad Meghalaya ki la rai ban aiti sha kane ka tnat ba kan tohkit halor katei ka jingjia ha Mukroh. Ha ka jingshisha, ka sorkar Assam bad Meghalaya ki la dawa naduh u Naiwieng 2022 na u Myntri Korbar Ri, u Amit Shah, ban phah tohkit ha ka CBI halor katei ka jingjia, hynrei dei tad haduh mynta ba kane ka tnat tohkit ka la pynrung ïa ki FIR.
Na kitei ki FIR, lai tylli ki dei kiba la ai na ka liang ka Assam bad kawei na ka Meghalaya. Ha ka FIR ba la ai da u Bah Stevenson Dkhar, uba dei u Sub-Inspector na ka thanat Nartiang, West Jaiñtia Hills, la ong ba ka sorkar Meghalaya ka la rai ban aiti sha ka CBI ba kan tohkit halor ka jingjia ha Mukroh ha kaba hynriew ngut ki briew ki la ïap namar ka jingsiat pathar ki pulit Assam. Namarkata, ïa ka mukotduma ba la pynrung ha thanat Nartiang (39(11)/2022) la aiti sha ka CBI.
Ha kawei pat ka FIR ba la ai da u Kajal Nath, Sub-Inspector ka tnat pulit Assam, la ong ba katei ka jingjia, ki pulit Assam ki la shah thombor da ki tiar pynmynsaw ha kaba u Havaldar Biren Das bad u Home Guard (Forest), u Abhimanya Das na ka Mukroh Beat Office ki la mynsaw jur katba u Forest Home Guard, u Bidyasing Lekthe u la khlad. La ong ruh ba ïa ka FIR ba la ai ha thanat Jrikyndeng (FIR No. 10/2022) ha kaba ïadei bad katei ka jingjia ha Mukroh la aiti sha ka CBI ba kan tohkit.
Ha kane ka FIR, u Kajal Nath u la kynnoh ruh ba u Aibor Shadap, MDC ba la ai da u Kajal Nath, la paw ruh ka kyrteng jong ki nongshah kynnoh (Accused) kiba kynthup ïa u Bah Aibor Shadap, MDC ka Barato-Mukroh, bad sa ar ngut kiwei pat.
Nalorkata, ki don sa ar tylli kiwei pat ki FIR ba la ai da u Shikari Enghee uba dei u Range Forest Officer I/c Protection Range, Hamren (Assam), bad u Sen Rongpi uba trei ha ka tnat Forest, Assam.
