Shillong, Jymmang 30
Ka Director General of Police (DGP) ka Jylla, Kong Idashisha Nongrang kaba la plie ïa ka jingkhang jong ka shlem treikam jong ka na bynta ki paidbah ka Jylla, ha ka Sngi Palei ka la sngap ïa ki jingeh bad jingkyrpad jong ki ‘riew paidbah bapher-bapher kiba la wan ban ïakynduh ïa ka.
Kum ban shu kdew hangne, ka Kong Nongrang hadien ba ka la shimti kum ka DGP ka Jylla ka la pynbna ba kan ïakynduh ïa ki ‘riew paidbah ha man la ka Sngi Palei naduh 11 baje mynstep haduh 2 baje nohphai sngi ha ophis treikam jong ka ha Shillong.
Kane ka sienjam ba la shim da katei ka khlieh ka tnad pulit ka Jylla ka la sdang naduh ka 30 tarik u Jymmang.
“Ki ‘riew paidbah na ki bynta bapher-bapher ki la wan. Ki don kiba la wan bad ki jingujor, katto-katne ki la wan ha ryngkat ki jingkyrpad na bynta ki jingïarap, katto-katne haba ïadei bad ki kam ha ka tnad pulit. Ngi la sngap lut ïa kine baroh bad ki don katto-katne kiba shu wan ai khublei bad nga la ai por lut ïa baroh,” la ong ka DGP haba kren sha ki lad pathai khubor.
Haba kylli halor ki jingkyrpad ba kyrkieh na ka liang ki paidbah, ka la ïathuh ba ki don ar tylli ki kynhun kiba la wan – kawei halor ki briew ba don jingduna dkhot met, ban ai jinghikai ïa ki pulit pynïaid kali haba ïadei bad ki briew ba don jingduna dkhot met, kaba na ka liang jong ka, ka la ong ba ka dei ka kam ka ban hap leh noh mardor.
“Kawei ka jingkyrpad ka la wan na kawei ka kynhun haba ïadei bad katto-katne ki jingjia kiba pynthut ha ka imlang-sahlang ha ki bynta bapher-bapher jong ka sor. Ïa kane ruh ngin sa khmih noh mardor,” ka la ong.
Ka DGP ka ong ruh ba na kiba wan ïakynduh ïa ka ha kane ka sngi, ki don kiba na ka tnad ‘Insurance’ kiba kwah pynlong ïa ki prokram ai jinghikai, kumjuh ka jingkyrpad kaba la wan na ki ‘Taxi Aggregator’.
Haba jubab, ka la ong, “Kane ka sienjam ka long kaba biang eh bad ki la don ruh kiba ‘phone’ bad kylli la ki lah ne em ban wan ha kiwei pat ki sngi ïa kaba nga la ong hooid, tangba ha kiwei pat ki sngi, kin hap kynjoh ktien shuwa ban wan. Hynrei mynta ka sngi ki lah ban wan beit kumto.”
Shuh shuh ka la bynrap ba ki don kumba 22 tylli ki kynhun ba kynthup katto-katne ki ‘riew shimet kiba la wan ïakynduh ïa ka ha kane ka sngi.
“Ka la don ruh kawei haba ïadei bad ka kam thombor pyrshah ïa ki kynthei,” ka la ong.
