Jowai, Jymmang 30
Uwei u nongrep na ka shnong Mookalangi Lapangap la suba ba u la shah pynïap dusmon ha ki ‘riew runar ki bym lah satia ban tip katba u dang don ha jaka rep ha khappud Assam bad Meghalaya.
Ïa une u nongrep la tip kyrteng kum Tellmi Talang, 31 snem rta na ka shnong Mookalangi Lapangap, West Jaiñtia Hills District.
Ïa ka met jong une u nongrep kaba la thiah lyngktar, la lap ha ka step 30 tarik ha jaka rep ha Khlieh Ladaw.
Katkum ka khubor na u Waheh Shnong Lapangngap, Bah Deimonmi Lyngdoh, u la ïathuh ba utei u nongrep ha ka step 29 tarik u la leit sha lyngkha ha ka por kumba 5 baje bad hadien ka jingbym poi ïing, ki bahaïing ryngkat ka shnong ki la leit wad ïa u sha jaka rep hynrei la lap pat ïa ka met jong u ha ka step 30 tarik Jymmang.
Halor kane ka jingjia u Waheh Shnong u la pyntip sha ki pulit ka Outpost Saitsama bad mar-mar ki pulit ki la hiar sha katei ka jaka ban pynlong ka jingtohkit bad la pynkit ïa ka met sha Jowai Civil Hospital, Ïalong ban leh ïa ka ‘Post Mortem’.
Na ka liang ki bahaïing bad ka shnong ki suba ïa kane ka kam dusmon la leh da ki nongshun kiba nabar shnong bad katkum ka khubor la ïathuh ba une u nongrep u don ïa ki dak mong ha ki bynta ka shyllangmat, khlieh, lyngkdong, bad ktien.
