Jowai, Jymmang 30
Ki nongshong shnong ka Kharkhana ki shong syier mynsiem tang shu poi ka aïom slap namar ka dei ka shnong kaba don sharum ka Wah Myntdu kaba la tip kum ka Wah Tisang ha kane ka thaiñ.
Kane ka shnong ka dei kaba kaba la kerkut da ki shnat wah barit bad ka long kum ka dewlynnong ha ka por lyïur khamtam haba ther jur u ‘lapbah ‘lapsan.
Ka shnong Kharkhana ka jngai tang 41 kilomitar na Amlarem Block bad 65 kilo mitar na ka nongbah Jowai kaba dei ka Headquater jong ka West Jaiñtia Hills District.
Kane ka shnong ka la shah ktah bha na ka jingwan lyngshop ka ‘erïong ‘Remal’ namar ka jingshlei jong ka Wah Myntdu kaba la poi shaduh ïing briew, ïingmane, ïingskul, jaka rep bad shaduh ki jaka ri jingri bad kaba la wanrah ka jingduhnong kaba khraw ïa ki lada ki shah rong ne shah tep ha ka umsaw.
Ki nongshong shnong ki ïathuh ba kim ïohthiah ïoh dem namar ka um ka la tap wat ïa ki tnum ïing bad ki hap ruh ban peit bad sumar ïa ki lieng kynda ïoh ba ki shah rong ha ka umsaw.
Kane ka shnong ka don 3 tylli ki wah rit kiba pynthut bha ïa ka leit ka wan ki nongshong shnong lyngba ka surok namar tang shu ther u lapbah kine ki wah ki shlei bad ka um ka ïaid nalor ka surok bad bunsien haba jia kum kane ka khep ki nongshong shnong ki hap ban shong khop ha ïing wat tang ban leit sha ki jaka sumar ruh um lait shuh na ka jingshlei um bad wanrah ruh ka jingpyut jong ki mar rep mar riang.
Katkum ka jingthew jong ka ophis ka Sorkar Pdeng Central Water Commission (CWC) kaba don ha ka shnong Kharkhana, la ong ba u lapbah uba la ther ha ka shnong Kharkhana ha ka 29 tarik Jymmang u la poi haduh 352.2mm kaba la wanrah ïa ka jingshlei um ka shnong na ka jingïoh bun u slap ha ka shi sngi.
Ka shnong Kharkhana ka kyrpad ïa ki bor ba dei khmih ban leh eiei na ka bynta kane ka shnong khnang ban suk ka leit ka wan namar ka surok na Muktapur Kharkhana ka pynïasoh bad ki shnong ba don sha East Jaiñtia Hills kum ka Rymbai,Lad Rymbai bad Khliehriat.
