Shillong, Jymmang 30
Ka Sorkar Jylla ka la pynbit pynbiang ïa ki jingdonkam na ka bynta ban ïoh jingithuh ïa ka skulbah jong ka Jylla bad la khmih lynti ba ka University Grants Commission (UGC) kan ai jingithuh da kaba pynmih ïa ka jingpynbna hapoh ka kyndon 2(f).
“Ngi khmih lynti ba ha ki ar bnai ban sa wan, yn sa ïoh ïa ka jingithuh bad ngi hap ban ïaid katkum ki kyndon jong UGC,” la ong u Commissioner and Secretary ka tnat pule puthi, u Syed M Razi ha ka Sngi Palei.
Haba kylli ïa ki jingdonkam kiba ka skulbah ka dei ban don na ka bynta ban sdang treikam, u la ong ba la kumno-kumno donkam ban thung briew ha ki 100 ki kyrdan treikam khnang ban lah sdang ïa ki tnat jingpule bad ki kolej kiba don ha Jylla ruh kin sa lah ban pynïasoh bad ka skulbah.
Haba ïadei bad ka jingbuh ïa ka Shillong Campus jong ka skulbah, u Razi u la ïathuh ba ka jingpynkhreh ka la nang ïaid bad na ka bynta shipor, ym buh ïa ka shlem treikam ha ka jaka ba don ka Shillong Engineering Government College kaba don ha syndah ka Shillong Polytechnic ha Mawlai.
Ka skulbah jong ka Jylla ka Captain Williamson Sangma University ka dei kaba la don naduh u snem 2011 bad ka dei kaba la don katkum ka aiñ kaba la mynjur da ka Ïingdorbar Thawaiñ ka Jylla ha ki phew snem kiba la leit.
La sdang nyngkong kum ka State Technical University ha Tura bad hadien ba ka Sorkar Pdeng ka la pyntreikam ïa ka CUET, ka Sorkar Jylla ka la rai ban pynkylla noh ïa kane ka aiñ da kaba pynlong noh kum ka skulbah jong ka Jylla kaba kynthup lang ïa ki jingpule kiba bun, ym shuh tang kum ka Technical University.
