Shillong, Jymmang:
Ka seng Samla Hima Malai Sohmat Syiemship hapoh ka jingïalam u Bah DT Ronsang kum u President bad u Bah Kyrmen Shangdiar kum General Secretary, ha ka 30 tarik u Jymmang ki la leit ban ïakynduh ïa u Bah Pynshngaiñ N. Syiem, Deputy CEM ka KHADC uba dei peit ïa ka tnad Elaka halor ka jingdawa ban pynlong noh mardor ïa ka ilekshon ban jied bad thung Syiem bapura noh hapoh ka Hima Malai Sohmat kaba hap hapoh ka East Khasi Hills District.
Haba ïakren bad ki lad pathai khubor hadien ka jingïakynduh ïa u Bah Pynshngaiñ N. Syiem, na ka liang u Bah Tyngshaiñ Ronsang u la ïathuh ba la kumba 12 tylli ki snem eiei, ka Hima Mali Sohmat kam don ïa u Syiem u bapura u ban synshar ïa ka it ka hima, hynrei baroh shi katta la shu peit bad khmih da ki Acting Syiem bad kat haduh mynta la thung Acting Chief ïa u Bah Brasing Dewsaw.
“Ka dei na kane ka daw, na ka liang jong ngi ka Seng Samla ka Hima ngi dap da ka jingsngewkhia namar ngi ïohi ïa ka jinglong hapoh ka hima jong ngi lada ngim don ïa u nongsynshar uba pura long ba ka hima jong ngi kam poi shaei-shaei ruh”, la ong u Bah Rongsang. Ban wanrah ka jingmyntoi ïa ka hima hi baroh kawei, na ka liang ka seng samla ka la kyntu jur ïa ka KHADC ba kan pynlong noh kloi ïa ka ilekshon jied Syiem bapura hapoh ka Hima Malai Sohmat.
“Ngi wan ban dawa na ka District Council ba la kumno-kumno ba kin pynlong noh ïa ka ilekshon ban jied ïa u Syiem bapura hapoh ka hima jong ngi bad lada long kaba lah ban pynkloi ïa kane ka kam namar ngi ïohi ba hapoh ka Hima jong ngi haduh kine ki por bad ki sngi, ngi ïohi ki mih shibun ki jingeh kiba ngi ïakynduh”, la ong u Bah Rongsang.
Shuh shuh u Bah Rongsang u la ong ba ka jingwan jong ka Seng Samla ka Hima kam dei ba ka wan ban kynthoh ne pynksan bad pynrem ïano-ïano, hynrei ka jingwan jong ki ka long ba ki kwah eh ban ïoh noh ïa u Syiem bapura hapoh katei ka hima.
Ha kaba ïadei bad ka jingbym lah jong ka District Council ban thung ïa u Syiem bapura hapoh ka hima la 12 snem mynta, na ka liang ka Seng Samla Hima Malai Sohmat ka la pynpaw ka jingsngewdiaw bad ong ba ka District Council ka dei kaba peit ïa ki it bad ki hima bad kaba pynneh ïa ki riti ki dustur. Hynrei haba peit pat hapoh katei ka hima ka long kaei-kaei kaba ym sngew lah ban mutdur namar wat haba la ïaid la 12 tylli ki snem, ka District Council kam lah ban leh eiei na ka bynta ban pynïoh ïa u Syiem bapura.
U Bah Kyrmen Shangdiar haba bynrap u la ong ba kum ki samla ki dap da ka jingsngewkhia bad sngewsih haba pyrkhat ïa la ka jong ka hima kaba khlem don u Syiem u ban synshar ïa ka it ka hima bad ha kajuh ka por, ka seng samla jong ka hima ka dawa ïa ka KHADC ban thung noh ïa u Syiem bapura bad maham ruh ba lada kam lah ban thung noh kloi ïa u Syiem, ka seng samla hi kan sa shim da kiwei pat ki lad ki lynti jingïakhih ban pynurlong ïa ka jingdawa jong ki.
“Lada na ka liang ka District Council kan nym lah ban leh eiei ïa kane ka kam, ngi na ka liang ka Seng Samla Hima ngin sa pynheh ïa kane ka jingïakhih jong ngi, kam dei shuh ba ngin wan tang da ki 15-20 ngut hynrei ngin hap ban pyni da kino-kino ki kam ki ban long ka lad ïa ngi ba ngin ïoh ïa u Syiem bapura khnang ba ka Council kam dei shuh ban lehkai ïa ka kam hapoh ka Hima Malai Sohmat”, la bynrap u Bah Shangdiar.
Na ka liang u Deputy CEM u la ong ba un sa pyrshang katba lah ban ïaleh kham kloi ban wanrah ïa u Syiem bapura hapoh katei ka hima katkum ka jingdawa jong ka Seng Samla.
