Mairang, Jymmang 31
U District Magistrate (DM) jong ka Eastern West Khasi Hills u Bah G Kharmawphlang, u la pynjari da ka kyndon 144 CrPC ha baroh ka thaiñ Mairang halor ka jingujor ba ka don ka jingbret pathar ïa ki plastic bad ki ñuit khamtam ha ki surok, ki lynti ki synkien bad ki wah kaba la long kaba isaitmet bad kaba la ktah ïa ka jingtuid jong ki um ha ki nala, ki wah bad ki wah duid.
U DM ha ka kyrwoh khubor u la ong, la kyntu ïa ki sordar shnong, ki rangbah shnong jong ka thaiñ Mairang ba ki dei ban peit ïa la ki shnong ki thaw bad kim dei ban shah ban pyndonkam ïa ki plastik ne kino-kino ki mar bym pyut ha kino-kino ki jaka la ka long ha ki ïing ki sem, ki dukan ne ha ki ïew ki hat, namar ka buh ka jingma ïa ka mariang bad ruh ïa ka koit ka khiah jong u briew lane ki mard kiba don ha ryngkew ne shapoh um.
Shuh shuh u DM u la ong ruh ba katkum ka kyndon 133 CrPC, kino-kino kiba die bad pyndonkam ïa kine ki jait plastik bym pyut kin shah pynshitom katkum ka aiñ.
U la ong ruh ba kane ka hukum kan trei kam mardor tad haduh ban pynbna da kumwei pat bad kino-kino kiba kwah ban ujor ki lah ban leh ïa kata ha ka 5 tarik u Jylliew 2024.
