Mawkyrwat, Jymmang:
Ka KSU South West Khasi Hills District ha ka 30 tarik u Jymmang hapoh ka jingïalam u samla Forwardman Nongrem, President KSU South West Khasi Hills District bad samla Jiedskhem Nongsiej, General Secretary, ki la leit ïakynduh ïa ka Dr. F.V. Kharshiïng, Director of Health Services (MI) ban ïakren halor ki mat ba ïadei bad ka koit ka khiah ha South West Khasi Hills District bad hapoh Mawsynram C&RD Block.
Katkum ka kyrwoh khubor na u samla Forwardman Nongrem, u la ïathuh ba ha kane ka jingïakynduh, ka seng ka la ban jur halor ka jingthung kam shipor (contractual) ïa palat 50 ngut hapoh ka Civil Hospital Mawkyrwat khlem da pyllait ïa ka ‘Advertisement’ ne khlem da khot ‘Interview’ shuwa ban thep ïa ki ha ki kam bapher-bapher. Ka KSU lyngba ka jingthoh ba la phah sha kane ka Director ka la sngewkhia jur halor kane ka thungkam thungjam khlem da ïaid ïa ki kyndon ba la buh ha kaba ka la pynduh jingshaniah ïa ki samla thep kam thep jam napoh ka distrik.
Ka seng ha kane ka jingïakynduh ka la dawa na ka Director ba ka dei ban shimkhia bad pynbeit halor kane ka mat thungkam thungjam shwa ba ka seng kan shim da kiwei pat ki sienjam.
“Ngi kyntu ïa ka ophis ba ka dei ban pynbeit halor kane ka bynta da kaba pyllait ‘advertisement’ bad khot ‘interview’ khnang ba ki samla kin ïoh ïa ka lad ban ïakhun ïa ka ‘interview'”, la ong u samla Forwardman Nongrem.
Ka seng ka kyntu ruh ïa ka Sorkar ba ka dei ban phah noh ïa baroh ki kam sha ka DSC ne MPSC ym ban buhrieh ïa ki ha kane ka Civil Hospital khnang ba ka DSC ne ka MPSC kan ïoh leh ïa kaba donkam ban pyllait ‘advertisement’ bad khot ‘interview’ khnang ba ki samla kiba dei hok ban ïoh kam kin ïoh rung kum ki nongtrei hapoh ka Civil Hospital.
Naka liang ka Director of Health Services (MI) ka la kular ha ka seng ba kan bthah ïa u District Medical and Health Officer, South West Khasi Hills District ba u dei ban pyntip ïa baroh ki kam ha kane ka Hospital sha ka DSC ne MPSC khnang ba kine ki tnad thungkam thungjam kin ïoh ban thung pura noh ïa ki nongtrei da kaba pyndam noh ïa ki nongtrei kiba rung na kyrpong ïing.
Ha kane ka sngi, ka seng ka la ïoh ban rah ruh ïa kiwei ki mat, kata ban pynbha bad maramot ïa ka Mawsynram PHC, ban pynsted ban pyntrei ïa ka Jyllep bad Mawhiang Sub-Centre ïa kaba la phah ban mang tyngka lyngba ka PMABHIM, ban kyntiew ïa ka Ranikor CHC sha ka First Referral Unit (FRU) CHC da kaba pynbiang ruh ïa u ‘Pharmacist’ ba tikna bad ka ‘X-Ray Machine’ hapoh kane ka CHC ban pynsted haba ïadei bad ka ‘Pediatric Ward hapoh Civil Hospital Mawkyrwat.
