Jowai, Jymmang 31
Uwei u samla u la duh noh ïa ka jingim hadien ba u la shah bat ha ka bording katba u dang ‘charge’ ïa ka Mobile Phone ha la ïing ha ka shnong Pamtadong kaba hap hapoh ka Amlarem Sub-Division West Jaiñtia Hills District.
Une u samla u dei ba la tip kyrteng kum u Tol Sana, 23 snem rta. Kane ka la jia ha ka 30 tarik Jymmang ha ka por kumba 6 baje janmiet.
Ki pulit kiba la ïoh pdiang ïa ka jingujor halor kane ka jingjia na u Assistant Executive Engineer jong ka Amlarem Sub-Division, ki la hiar sha katei ka shnong ban leh ïa kaba donkam.
Halor kane ka jingjia, ki bahaïing hasem kim don kano-kano ka jingsuba sniew bad ki la kyrpad ban pyllait noh ïa ka post mortem. Kumta na ka liang u Majistor ruh u la ai ka jingmynjur bad na ka liang jong ki pulit ki la aiti noh ïa ka met sha ki bahaïing ban pyndep ïa ka niam ka rukom.
