Shillong, Jymmang 31
Ka seng Hynñiewtrep Youths’ Council (HYC) ka la trei khlem shongthait ban khynra drok kumba ka la dep ban pynbna ïa ka thma pyrshah ïa u drok kaba la bteng haduh kine ki sngi. Kumta ha ka 31 tarik u Jymmang, ka seng sa shisien ka la leit ban khynra biang ïa ki nongdih drok kiba don ha ki bynta ka Khyndailad bad ka la ïoh ban bat haduh 10 ngut ki briew kiba kynthup ïa 2 ngut ki kynthei.
Lah ban kdew ba ki nongïalam bad dkhot ka HYC ki la leit ban khynra drok ha Khyndailad tang hadien ba ki la mih na thanat Sadar ha ka jingleit synran ïa u Secretary ka seng u Bah Isaac Basaïawmoit uba la shah khot hajir ha ki pulit halor ka jingleit pynpra jong ka seng ïa ki ïing ba sah be-aiñ da ki poiwir ha Lum Survey.
Na ka met jong kitei 10 ngut, ka seng ka la ïoh ban kurup ïa u drok ba la thep bha hapoh ki bilor rit ha ryngkat ki thyrnia injek drok bad ki tiar ïada ha ka shongkha-shongman.
Hadien ba ka seng ka la kylli tohkit na kitei ki briew halor ka jingïoh jong ki ïa u drok, na ka liang ka seng ka la thang noh syndon ïa ki tiar ba la ïoh kurup na kitei ki nongdih drok.
