Shillong, Jymmang 31
Ka FKJGP Balat ka la mih shakhmat ban kyntu ïa ka sorkar jylla ba kan khang noh ïa ki trok kit dewïong ban ïaid na ka surok Mawsynram sha Balat namar ka la pynsniew palat ïa ka surok.
U President ka FKJGP Balat Unit, Bah Sengborlang Syiemlieh, u la ong ba ka jingkit palat pud jong ki trok kit dewïong ka la pynsniew shuh shuh ïa ka surok kaba la shna ban ïaid tang ki kali rit.
U la ïathuh ba ha kane ka taïew ba ther u slap kawei ka trok kit dewïong ka la sahkut haneng ka shnong Tlongpleng hajan Riatmawniuh kaba la pynsahkut palat ar kynta ïa ki kali kiba kiew bad hiar.
“Ngim tip shuh kine ki trok ki wan naei bad ki mut leit shaei namar mynta man ka sngi la dap beit da ki trok kit dewïong” u la ong.
U Bah Sengborlang u la kyntu ïa ki nongmihkhmat hapoh ka konstitwensi ba kin peit lem ïa ka jingeh jong ka thaiñ namar ynda la sniew ka surok kan buh jingeh ïa ki paidbah kiba leit ba wan.
Shuh shuh u la ong ba ka surok Mawsynram shaduh Balat nalor ba ka rit bad ka riat mynta kan sa sniew bad buh jingeh ïa ki paidbah kiba leit bad kiba wan khamtam ïa kiba pang ba shitom.
Une u nongïalam ka FKJGP Balat Unit u la ong ba ka jingïaid ki trok kit dewïong kam shym la ai jingmyntoi ïa ki paidbah hynrei ka pynkhapngiah ïa ka surok kaba rit.
Namar kata, u la kyrpad ïa ka sorkar lada ka dang shah ïa ki trok dewïong ka dei ban shna noh da ki surok kiba rben bad kiba heh khnang ban suk ki paidbah kiba leit ba wan.
