Tura, Jymmang 31
Ka New Tura Development Forum (NTDF) ha ka Sngi Thohdieng ka la pynpaw ïa ka jingpyrshah lada don ka jingpynthymmai ïa ka rukom bhah kam katkum ka ‘Job Reservation Policy’ kaba mynta bad ka la kyntu ïa ka sorkar jylla ba kan pynneh beit kumjuh.
Ka jingpyrshah jong ka NTDF ka la long ha ka dur jong ka shithi ba la phah sha u Secretary ka Expert Committee ba la thung da ka sorkar jylla ban peit bniah ïa ka ‘Job Reservation Policy’ kaba bhah ïa ka rukom ai kam ai jam ïa ki Khasi Jaiñtia bad ki Garo bad kiwei-kiwei.
Na ka liang ka NTDF ka la pynpaw ba ka sur jong ka, ka dei ka sur jong baroh ki nongshong shnong kiba dei na ka jaitbynriew Garo.
“Ngim dawa ban pynkylla ïa ka Reservation Policy namar ïa kane la pyntreikam da ki nongïalam bad ki nongseng ïa ka jylla Meghalaya da kaba peit bniah ïa ka rukom long rukom man jong ka jaitbynriew Khasi Jaiñtia ha kawei ka liang, bad ka jaitbynriew Garo ha kawei pat ka liang. Kine ki ar jaitbynriew ki don kumba 80 na ka 100 ha ka jylla, bad ïa ka Meghalaya la pynïakhlad na ka Assam khnang ba kine ki jaitbynriew kin ïoh jingmyntoi,” la ong ka NTDF ha ka shithi.
Shuh shuh ka la ong ba ïa ka ‘Reservation Policy’ ym shym la pyntreikam katkum ka jingdon paid, hynrei katkum ka jingsahdien jong ki jaitbynriew kiba don ha ka jylla khamtam ki Garo kiba dang sahdien bha ha kato ka por.
“Mynshwa, ngi la dep ban pynpaw ïa ka jingpyrshah ban pynkylla ïa ka Reservation Policy ryngkat bad kiwei pat ki seng kum ka Tura Garo Senior Citizens Forum, Garo Graduate Union bad kiwei. Ngim kwah ba ki Garo kin duh ïa ka bhah jong ki,” la ong katei ka kynhun.
Ha kawei pat ka liang, ka Kur Chisim (Chisim Mahari Association) kaba na Tura ka la pynpaw ïa kajuh ka sur ban pyrshah ïa ka jingpynkylla ïa katei ka bhah thung kam. Ki dkhot jong kane ka Kur ki la ïakynduh kyrkieh ha ka 30 tarik Jymmang ha Tura bad la pynpaw da kawei ka sur ba dei ban pynneh beit ïa ka ‘Reservation Policy’ kumba ka long bad ym dei ban pynkylla ïa ka.
Sa kawei pat ka kynhun na Williamnagar ïa kaba la tip kum ka Niksamso Garo Community Organization (NGCO) ka la pynpaw ïa ka jingsngewkhia lada pynkylla ïa ka Reservation Policy, bad ka la dawa ba dei ban pynneh beit kumjuh, kata, 40% na ka bynta ki Khasi Jaiñtia bad 40% ïa ki Garo.
