Nongstoiñ, Jymmang:
Wat la haduh ba thoh ïa kane ka khubor, ka West Khasi Hills ka dang lait na ki jingjia kum na ka jingtwa khyndew, ka jingsahkut ha ka ïaid ka ïeng, ka jingshlei um na ka jinghap jong u slap bad ka jingwan jong ka lyer ka la bteng mynta la katto-katne sngi hynrei ha ka 30 tarik u bnai Jymmang, kawei ka skul ka la shah rat na ka jingwan kynsan ka ‘erïong.
Katkum ka tyllong khubor, katei ka jingjia ka la jia ha ka 30 tarik u bnai Jymmang 2024 ha ki por kumba 1.30 mynsngi katba ki khynnah skul bad ki nonghikai ki dang don hapoh ka skul hynrei kyndit-kynsan ka ‘erïong ka la wan ha kaba ka la rat ïa ki bynta ba shakhmat jong kane ka skul.
Ka khubor ka ïathuh ruh ba katei ka skul ka dei skul St. Dominick Secondary School, Nong Diwah Umyiap, Nongstoiñ, West Khasi Hills District. Ha kane ka jingjia, katei ka skul ka la julor ha baroh ki bynta ba shakhmat.
Shuh shuh la ong ruh wat la katei ka skul ka la shah rat, hynrei donbok ba wat la ki khynnah skul bad ki nonghikai ki dang don hapoh klas, hynrei kim don kino-kino ki jingmynsaw ne jingjia ba sngewsih.
Halor kane ka bynta, ka kyrwoh ba la phah da u President ka Hynñiewtrep Youths’ Council, Umyiap Area Unit (HYC), u la kyntu ïa ki nongmihkhmat kum u MLA, MDC ka Nongstoiñ, u BDO ne ïa kino-kino kiba halor ban phai khmat lem sha katei ka skul.
U la ong ruh ba ka seng ka kyntu ruh ïa baroh ki skul kiba don ha ka thaiñ Umyiap ba ha kum kine ki por ban sngewbha ban da phikir bad peit bha ïa ka rukom long jong ki kamra klas ha ka ban pyntikna ba ki skhem ne em, bad ka seng ka kyrpad ba ïa ki khynnah klas 8 shapoh kan jin da la bha ban ai shuti shuwa tad haduh yn da la duna u slap ka lyer ba jur.
