Shillong, Jymmang 31
Ki nongïalam bad ki dkhot ka Hynñiewtrep Youths’ Council (HYC) ha ka Sngi Thohdieng jong ka 31 tarik u Jymmang 2024, ki la leit ban synran sa ïa u Secretary ka seng, u Bah Isaac W. Basaiawmoit uba la shah khot hajir ha ki pulit ka thanat Sadar ha ryngkat ka jingsynran lang ka kmie ha kaba ïadei bad ka jingleit pynpra bad kyndang jong ka seng ïa ki ïing kiba don ha Lum Survey.
Kum ban shu kdew hangne, ki 3 ngut ki nongïalam ka HYC ki la shah khot hajir ha thanat Sadar ha kaba ïadei bad ka jingleit kyndang bad pynpra ïa ki ïing jong ki poiwir kaba don ha Lum Survey ha ka step jong ka 23 tarik u Jymmang 2024. Kane ka long hadien ba la ïohi ba na liang ka sorkar kam shym la leh eiei wat hadien ba la dap shi bnai eiei ba ka seng ka la leit ban ujor halor kane ka jingdon ki briew kiba sah beaiñ ha katei ka jaka.
Kitei 3 ngut ki nongïalam ka HYC kiba la shah khot hajir ki kynthup ïa u President, Bah Roy Kupar Synrem, u Vice President, Bah Donboklang Kharlyngdoh bad u Secretary, Bah Isaac Basaïawmoit.
Halor katei ka jingleit pynpra ka seng ïa ki ïing jong ki poiwir kiba don kumba 80 tylli, na ka liang ka sorkar ka la kheiñ ba kane ka jingleh jong ka seng ka long kaba beaiñ bad ki la shem ïa ka aiñ ha ki kti.
Kitei 3 ngut ki nongïalam ka seng ki la shah pynngat ha ka aiñ Meghalaya Maintenance of Public Order (MMPO) bad ki la shah pynngat mukotduma ruh ha kiba bun tylli ki kyndon IPC kiba kynthup ïa ka 452, 427, 461, 506, 143, 144, 145 bad sa 7 tylli kiwei pat ki kyndon IPC.
Kitei ki 3 ngut ki nongïalam ba hakhmat ka seng ki la wan ban hajir ha thanat Sadar ha kaba u President, Bah Roykupar Synrem u la shah khot hajir ha ka 28 tarik, u Vice President, Bah Donboklang Kharlyngdoh u la shah khot hajir ha ka 30 tarik bad u Secretary pat, Bah Isaac W. Basaiawmoit u la shah khot hajir ha ka 31 tarik.
La synran lang ruh ïa u Bah Isaac ha katei ka sngi da ki nongïalam ka seng kiba kynthup ïa u Bah Roykupar Synrem bad u Bah Donboklang Kharlyngdoh ha ryngkat ki jingpyrta ban ai mynsiem ïa ka seng baroh kawei.
Haba ai jingkren sha ki lad pathai khubor hadien ba u la mih na ka jingwan hajir ha thanat Sadar, u Bah Isaac Basaïawmoit, u la ong, ba ka katei ka jingkhot hajir ki pulit ïa ki nongïalam ka seng ka dei tang ban pyntieng khnang ba ka seng kan nym lah shuh ban ïaid shakhmat ban khynra ïa u drok hynrei katba ki dang shah khot kumne, ka mynsiem jong kitei ki nongïalam ka dang shlur bad rhem ban dang ïai kyndang ïa u drok bad ïa ki poiwir.
“Nangne shakhmat ngin dang ïai kyndang shuh-shuh ïa u drok bad ngin nym shongthait ne shong kli-kti, bad mynta ngin da dep nangne ruh ngin pyrshang ban leit kyndang biang haduh ba ngin da lah ban pynduh jait”, la ong u Bah Isaac.
U Bah Isaac u la ong ba kane ka jingshah khot hajir ha thanat Sadar kam dei shuh ha ka sien kaba nyngkong, hynrei ka jingshah khot hajir bad ka jingshah thep ha patok ka la dei da ki katno sien shuh bad kumta kim sngewpher shuh ïa kane ka jingshah khot.
“Na ka liang jong ngi ki nongïalam, ngim sngewpher shuh ïa ka jingshah pynngat mukotduma bad ha ki kyndon kiba bun, kane kam dei shuh ka sien kaba nyngkong hynrei la bunsien ngi la shah thep ha patok”, la bynrap u Bah Isaac.
