Shillong, Jymmang 31
Uwei u samla Khasi uba mlien dih drok u la kylla bamut da kaba im sngi ban tam ïa ki tiar jot bad bilor na ki thaiñ jong ka Ïewduh bad Motphran bad kumjuh ruh na kylleng ki ïew kiba don ha nongbah Shillong. Une u samla u dei ruh ba ka seng Hynñiewtrep Youths’ Council (HYC) ka la ïoh ban bat ha ka jingkhynra drok ha Motphran ha ki sngi ba la leit.
Ha ka jingkhynra drok ka seng ha ka miet jong ka 30 tarik u Jymmang ha ki bynta jong ka Garikhana, Mawbah, Khlieh Ïew bad Ïewmawlong, ka seng ka la ïoh ban bat biang ïa utei u samla katba u dang tam ïa ki tiar jot bad ki bilor na ka Stand Bhoi kaba don ha Garikhana.
Ha ka jing-ishan-khmat ïa utei u samla, ka seng ka la talasi na ka met jong utei u samla, hynrei kam shym la lap eiei shuh na u.
Utei u samla u la ïathuh bad phla sha ki dkhot ka seng ba naduh ba u shah bat ha ka seng ha Motphran u la kylla kaba mut bad u khlem dih drok shuh, hynrei u la pynleit jingmut beit ban kamai ïalade. Nangta u la ong ba mynta um ju ktah bad dih shuh ïa u drok, hynrei un ïai trei ïa la ka jong ka bylla ban kamai na ka umsyep lajong.
Kaei kaba kham sngewmyllung ka long ba utei u samla u la ïathuh ba u dei uba la nang la stad, hynrei namar ka jingbym ïoh kam ïoh jam, u la hap ban shu im sngi ban tam tiar jot narud suroh. Da kaba tam tiar kumtei na ïew na hat, u lah ban kamai haduh T. 3,000 ha ka shisngi bad kane ka kam ka la ïarap ba un pynbit pynbiang ha ïing ha sem.
Utei u samla u la ïathuh ba u ju leit tam tiar na Malki, Laitumkhrah, Mawlai bad kiwei-kiwei ki jaka.
Kumta na ka liang ka seng ka la sneng la kraw ïa utei u samla ba un nang ïai ïaid ha ka lynti kaba dei bad ba un kiar na u drok khnang ba un ïoh ïa ka jingim kaba bha bad un suk un saiñ.
