Shillong, Jymmang 31
Ha ka Sngi Thohdieng ka kynhun na ka State Disaster Relief Force (SDRF) ka la ïoh ban sei noh sa ïa ar tylli ki metïap kiba la shah ban na ka twa khyndew kaba la jia ha ka step Sngi Palei ha shnong Nongpriang.
Lah ban pynkynmaw ba ha katei ka step ha ka por kumba 2 baje eiei, haduh saw ngut ki briew ki la khlad noh na ka jingshah ban ha ka jingtwa khyndew ha ka shnong Nongpriang, East Khasi Hills. Na kine ki saw ngut ki briew, lai ngut ki dei na kajuh ka ïing.
Katkum ka jingpyntip ka tnat Disaster Management, ka kynhun SDRF ka la ïoh ban sei shuwa ïa kawei ka met ha ka por mynstep jong ka Sngi Thohdieng bad ïa kawei pat la ïoh ban sei haduh ka por janmiet.
Ki ar tylli ki metïap ba la ïoh sei ha ka Sngi Palei ki kynthup ïa ka jong u Bah Bisa Nongrum ba la 75 snem ka rta bad u samla Lumlang Riahtam ba dang 16 snem ka rta.
Ha ka Sngi Thohdieng pat la ïoh ban sei sa ïa ka met ïap jong u Bah Kynmaw Syngai ba la 70 snem bad ka Kong Benti Riahtam ba la 60 snem ka rta.
Ha kaba ïadei bad kane ka jingduh noh jong kitei ki saw tylli ki mynsiem briew na ka jingshah ban ha ka twa khyndew, na ka liang jong u Deputy Commissioner ka East Khasi Hills u SC Sadhu ha ka Sngi Thohdieng u la pynbna ïa ka jingïarap song pisa kaba mar 4 lak tyngka sha ki bahaïing jong kine ki lanot.
Ha kawei pat ka liang, u Myntri ba khmih ïa ka tnat Revenue and Disaster Management u Bah Kyrmen Shylla, u la pyntip ba un hiar lashai ka Sngi Saitjaiñ sha shnong Nongpriang ban leit peit leit jngoh ïa kane ka jingjia bad ruh ban ïakynduh ïa ki bahaïing hasem bad ban aiti ruh ïa ka song jingïarap.
Haba kren sha ki lad pathai khubor, u Bah Kyrmen u la ong ba haduh mynta ki la don haduh 5 tylli ki mynsiem briew kiba la duh noh na ka jingtwa khyndew, kata uwei ha shnong Sutnga bad saw ngut ha Nongpriang.
U Bah Kyrmen haba pynpaw ïa ka jingsngewlem sha ki bahaïing hasem u la ong, “Lashai ka sngi ngin hiar sha shnong Nongpriang bad ngin pyrshang ban wad ïa ki lad ki lynti ban kyrshan ïa ki bahaïing hasem bad ban aiti ruh ïa ka cheque ba mar 4 lak tyngka sha ki bahaïing jong kine ki lanot.”
