Shillong, Jymmang 31
U Deputy Commissioner (DC) jong ka East Khasi Hills ha ka Sngi Thohdieng u la pyntip ba la rai ban weng noh ïa ka jingmana ban ïaid rally ne proseshon ha ka sngi ñiew ‘vote’, bad ka kyndon 144 CrPC kan treikam tang ha ki jaka ñiew ‘vote’.
Kane ka rai jong u DC ka long hadien ka jingïalang kaba u la lum bad khot ïa baroh ki seng saiñ pyrthei, ki kyrtong shimet bad ka Synjuk ki Nongsynshar Shnong ka Bri U Hynniewtrep ha ka Sngi Thohdieng ha shlem treikam ka jong u.
Lah ban pynkynmaw hangne ba hadien ka jingpynbna jong u DC ban pynjari da ka kyndon 144 CrPC ban khang bad mana ïa ka jingïalum paidbah ha ka sngi ñiew ‘vote’ ha Polo, ka la mih ka jingpyrshah kaba jur na ka seng saiñ pyrthei ka Voice of the People Party (VPP), ha kaba u President Bah Ardent M Basaiawmoit u la pynbna ba kin nym kohnguh ïa kane ka rai hynrei ban mih paidbah beit.
Nalor ka VPP, ka HITO ruh kawei na ki seng ka la mih shakhmat ban pyrshah jur ïa kane ka rai jong u DC, da kaba kdew ba ka dei ka jingpynkheiñ ïa ka hok jong u paidbah.
U DC u la ong ba ki bor district hadien ka jingïasyllok bad ki seng saiñ pyrthei ka Jylla, la rai ban pynjynsur noh ïa ka jingpyntreikam ïa ka kyndon 144 CrPC.
U la pyntip ba la weng noh ïa ka jingmana ban ïaid paidbah ha ka sngi ñiew ‘vote’, da kaba pyntreikam ïa ka kyndon 144 CrPC tang ha ki jaka ñiew ‘vote’, bad u la ïathuh ruh ba kano-kano ka seng saiñ pyrthei kaba kwah ban pynlong ïa ka jingïaid jingjop, ki lah ban phah da ka jingthoh na kano ka lynti ne ka thaiñ ba ki thmu ban ïaid khnang ban pynthikna ba kan ym don kano-kano ka jingpynthut.
U DC u la pyntip ba na ka liang ki seng saiñ pyrthei bad ka Synjuk ki Nongsynshar Shnong ki la pynpaw ba kim sngewïahap halor ka jingpyntreikam salonsar ïa ka kyndon CrPC 144 ha baroh kawei ka East Khasi Hills.
Haba batai ïa ka kyndon 5 jong ka CrPC 144, u DC u la pyntip ba kane ka kyndon ka khang lad ban pynlong ka jingïaid paidbah ha baroh kawei ka district namar ka lah ban wanrah ka jingdheng kali bad ka lah ban wanrah ka jingpynthut ïa ka shongsuk-shongsaiñ.
Shuh shuh ha kajuh ka por pat u DC u la kyntu ïa ki paidbah ban ai ka jingïatreilang bad ki bor synshar district ban pynneh ïa ka aiñ ka kanun bad lada don kano- kano ka jingpynkheiñ aiñ yn shim da kaba tyngeh.
