New Delhi, Jymmang 31
Ka wat kaba hynñiew bad kaba khatduh jong ka jingthep ‘vote’ ban jied ïa ki MP Lok Sabha kan long ha ka Sngi Saitjaiñ ha 57 tylli ki konstitwensi ha ki phra tylli ki jylla ba kynthup ïa ka Varanasi konstitwensi kaba mihkhmat da u Myntri Rangbahduh, u Narendra Modi.
Nalor ka jingjied MP, lashai yn pynkut ruh ïa ka jingjied sa 42 ngut ki MLA bathymmai ka Ïingdorbar Thawaiñ ka jylla Odisha.
Ki 57 tylli ki konstitwensi Lok Sabha ki don ha Bihar, Chandigarh, Himachal Pradesh, Jharkhand, Odisha, Punjab, Uttar Pradesh bad West Bengal.
Ka jingthep ‘vote’ ban jied MP Lok Sabha ka la sdang ha ka 19 tarik Ïaïong ha ka wat banyngkong. Haduh ka wat kaba hynriew, ka jingthep ‘vote’ ka la dep long ha ki 486 tylli ki konstitwensi. Ka jingñiew ‘vote’ ban tip ïa ki nongjop ha 543 tylli ki konstitwensi kan long ha ka 4 tarik Jylliew ha baroh kawei ka Ri.
Na ka bynta ka jingthep ‘vote’ ha 57 tylli ki konstitwensi lashai ka sngi, kin don haduh 10.06 klur ngut ki nongthep ‘vote’ bad 10.9 lak ngut ki nongpynïaid ïa ka ilekshon ha phra tylli ki jylla. Ka jingthep ‘vote’ kan sdang ha ka por 7 baje mynstep, hynrei ka por ba kut ka jingthep ‘vote’ kan ïapher na kawei ka konstitwensi sha kawei pat.
Ha ka jingpynkhreh ïa ka ilekshon ha kane ka wat bakhatduh, la pyndonkam ïa 13 tylli ki rel bad 8 tylli ki Helicopter ban leit buh ïa ki nongpynïaid ilekshon bad ïa ki bor pahara.
