Nongstoiñ, Jymmang 31
Ka jingïai peitngor jong ki dkhot ka Hynñiewtrep Youths’ Council (HYC) ïa ki nongdih bad nongdie drok ha ki bynta ka sor Nongstoiñ ka la nang ïai bteng ha kaba ka khubor na ki nongïalam ka seng, la ong ba ha ka Sngi Thohdieng ka seng ka la ïoh ban kem biang ïa ki nongdie bad nongdih drok.
U Vice President ka HYC Nongstoiñ Circle samla Olivertwis Marngar, u la ong ba ïa kitei ki nongdih bad nongdie drok la ïoh bat bad kem na ka jingtei kaba dang shna thymmai jong ka shlem treikam ka Nongstoiñ Block.
Shuh shuh la ïathuh ruh ba kitei ki nongdih drok ki la thmu ban tuh ïa ki tiar misteri kum ki machine motor tan um bad kiwei kiwei. Ïa kane la pyntip da ki nongtrei kiba trei ha katei ka jaka ha ka por kumba 3 baje eiei mynstep.
U samla Olivertwis u la ïathuh ruh ba ha katei ka jingïoh bat ïa kitei ki briew, ka HYC ka la ïoh ban kurup ïa ki tiar drok bad la thang noh ïa ki. Ka seng hadien ba la dep tohkit ïa kine briew ka la aiti shwa sha ki bahaïing bad ka la kren ruh da kaba shai ba kito ki samla kiba la ngop ha u drok lada ki kwah ban kylla, kin wan shakhmat ryngkat bad ki bahaïing hasem ha kaba ka seng kan sa ïalam lynti ban phah sumar.
Utei u nongïalam u la pyntip ba ka HYC kan dang ïai bteng na ka por sha ka por ban khynra ban thwet ïa ki nongkhaïi drok ha ki bynta jong ka Nongstoiñ hi baroh kawei ban ïakhun bad rat dyngkhong ïa u drok na ka thaiñ.
Shuh shuh u la kyrpad ruh ïa baroh ki ‘riew paidbah, ki nongshong dukan, ki nongñiah kali tourist, kali kamai ban ïatrei lang bad ka seng khnang ban lah pynduh jait noh ïa une jingdih.
