Shillong, Jymmang 31
U Myntri ka tnat Revenue and Disaster Management, Bah Kyrmen Shylla, ha ka Sngi Thohdieng u la pyntip ba ha ka jingwan syllad jong ka ‘erlangthari Remal, ki la don haduh 558 tylli ki shnong kiba la shah ktah bad 5 tylli ki mynsiem briew ki la duh noh ha ka Jylla.
Haba kren sha ki lad pathai khubor, u Myntri u la ïathuh ba katkum ka kaiphod kaba la ïoh pdiang halor ki jingkheiñ jong ka jingshah ktah bad shah pynjulor na ka ‘erlangthari Remal ryngkat ka jingther jong u ‘lapbah ‘lapsan hapoh ka jylla, kata haduh ka por 1 baje mynsngi jong ka Sngi Thohdieng, ki la don haduh 558 tylli ki shnong kiba la shah ktah, 1423 ngut ki briew ba la shah ktah ha 11 tylli ki district katba ka South Garo Hills kam pat phah satia ïa ka kaiphod.
U la ong ba nalor ka jingshah pynjulor jong ki ïing, jingthung jingtep, jingri jingdup, ka la don ruh ka jingduh noh ïa ki 5 tylli ki mynsiem briew.
Haba ai jingkheiñ ïa ki jingshah pynjulor na u ‘lapbah kat haduh ka por 1 baje jong ka Sngi Thohdieng, u Myntri u la pyntip ba ka jingdon jong ki shnong kiba shah ktah ha East Khasi Hills ka la long 67 tylli, ha East Jaiñtia Hills 45 tylli, ha Ri Bhoi 19 tylli, ha Eastern West Khasi Hills 23 tylli, ha South West Khasi Hills 29 tylli, ha South West Garo Hills 21 tylli, ha West Garo Hills 139 tylli, ha East Garo Hills 92 tylli, ha North Garo Hills 105 tylli, ha West Khasi Hills 11 tylli bad ha West Jaiñtia Hills 7 tylli.
Katba ha kaba ïadei bad ka South Garo Hills, u Myntri u la pyntip ba ka jinglum jingkheiñ ka dang ïaid shaid-shaid. “Ngi la dep ban bthah ruh ïa u Deputy Commissioner jong ka South Garo Hills ban phah ïa ki jingtip sha nga bad kin sa pyrshang ban pynsted ïa ka kam”.
Shuh shuh u la pyntip ba ki ïing kiba la shah pynjulor kata haba phai ha East Khasi Hills ki long 54 tylli, East Jaiñtia Hills 46 tylli, ha Ri Bhoi 18 tylli, ha Eastern West Khasi Hills 25 tylli, ha South West Khasi Hills 66 tylli, ha South West Garo Hills 58 tylli, ha West Garo Hills 368 tylli, ha East Garo Hills 341 tylli, ha North Garo Hills 434 tylli, ha West Khasi Hills 12 tylli bad ha West Jaiñtia Hills kawei.
Katba ki jingtei kiba la shah pynjulor kata ha East Khasi Hills ki long 41 tylli, ha East Jaiñtia Hills 40 tylli, ha Ri Bhoi 2 tylli, ha Eastern West Khasi Hills 18 tylli, ha South West Khasi Hills 25 tylli, ha South West Garo Hills 2 tylli, ha West Garo Hills 34 tylli, ha East Garo Hills 16 tylli, ha North Garo Hills 9 tylli, ha West Khasi Hills kawei bad ha West Jaiñtia Hills 3 tylli.
