Jowai, Jymmang 31
Ban pynsuk ïa ka leit ka wan jong ki kali ha ka sngi ñiew ‘vote’ ka ban long ha ka 4 tarik Jylliew, u Superintendent of Police (SP) ka West Jaiñtia u la pynbeit ïa ka rukom ïaid kali ha katei ka sngi naduh 7.00 baje shaneng.
La khang ban ïaid kali na Lad Thomas Jones shaduh DC ophis, kumjuh na Tpep Pale shaduh Iawmusiang, na Mission Compound shaduh Iawmusiang/DC ophis.
La khang ruh ban ïaid na lai lad HK Singh shaduh DC ophis bad la khang ban ïaid na Dawki Stand shaduh DC.
Baroh ki kali kiba wan na ka thaiñ Riatsiatsim kin khun na Mynthong District Library bad baroh ki kali kiba wan na ka thaiñ Khimusniang, Jrisalein kin khun na surok Chutwakhu kumjuh ruh ki kali kiba wan na ka thaiñ Loomsooiung, Shillong Road kin khun na Kynruh Saphlang bad Thomas Jones.
Ha ka 4 tarik Jylliew baroh 4 tylli ki jaka pynïeng kali ha Iawmusiang kin thylli naduh ka por 7.00 baje mynstep.
