Nongstoiñ, Jymmang 31
U Superintendent of Police (SP) jong ka West Khasi Hills u la pynbna paidbah halor ka rukom pynbeit ïa ka jingïaid jong ki kali hapoh ka sor Nongstoiñ na ka bynta ka ïaid beit ïaid ryntih jong ki kali ha ka 4 tarik kaba dei ruh ka sngi ñiew ‘vote’ jong ka ilekshon MP na ka bynta ki lai tylli ki Assembly Constituency ka West Khasi Hills District hapoh ka shlem treikam u DC, Nongstoiñ.
Ha ka kyrwoh khubor ba la phah, u SP u la ong ba ka rukom pynbeit ïa ka jingïaid kali ka long ba ïa ka surok na Ladweitang ban leit sha DC ophis la pynbna ban ïaid tang shi lynti (one way) bad yn shah tang ïa ki kali kiba kiew sha ophis DC bad khlieh ïew Nongstoiñ.
La ong ruh ban ym shah rung kali shimet ne kali kamai na stand Civil sha khlieh ïew bad ïa ka lynti ïaid kjat na khlieh ïew sha DC ophis yn khang noh bad yn ym shah rung kali na khlieh ïew sha ka jaka ñiew ‘vote’.
Yn shah ban ïeng kali tang ïa ki nongtrei ha ophis DC, ki ophisar bad ki counting agent tang ha shiliang ka surok ha shilynter naduh ka Indoor Stadium shaduh khlieh ïew.
