Shillong, Jylliew 02
Ha ka jingñiew ‘vote’ ha Arunachal Pradesh bad Sikkim hadien ka jingthep ‘vote’ ha ka ilekshon sha ka Ïingdorbar Thawaiñ jong kine ar tylli ki Jylla, ka Sikkim Krantikari Morcha (SKM) ka la jop kput da kaba ïoh jingjop ha 31 tylli ki konstitwensi na 32 tylli, katba ka BJP ka la jop ha 46 tylli ki konstitwensi na 60 tylli ki konstitwensi.
Ïa ka ilekshon MLA ha Sikkim bad Arunachal Pradesh la pynlong lang bad ka ilekshon Lok Sabha, hynrei ka jingñiew ‘vote’ kaba la pynlong ha ka Sngi U Blei, la leh tang na ka bynta ka jingthep ‘vote’ ha ilekshon MLA bad ïa ka jingñiew ‘vote’ na ka bynta ka ilekshon MP kan long ha ka 4 tarik ha baroh kawei ka ri.
Da kane ka jingjop ha ka ilekshon sha ka Ïingdorbar Thawaiñ, ka SKM bad ka BJP ki la wanphai biang ban shimti ïa ka jingsynshar ha Sikkim bad Arunachal Pradesh.
Ka SKM hapoh ka jingïalam u Myntri Rangbah u Prem Singh Tamang ka la ïoh haduh 31 ngut ki MLA katba ka Sikkim Democratic Front (SDF) kaba don ha ka liang pyrshah ka jop sa tang uwei u MLA ha kane ka ilekshon MLA.
U Tamang u la ai ka jingïaroh ïa baroh ki nongtrei bad nongkitkam ka SKM kiba la trei borbah na ka bynta ban pynpoi ïa ka seng sha ka thong jong ka jingjop kaba donburom.
U la ong ba kane baroh ka dei namar ka jingshaniah kaba ka SKM ka ïoh na ki paidbah bad ka jingtrei borbah ki nongtrei jong ka seng da kaba bynrap ba ka SKM mynta kan ai ka jingshakri kaba long 100 na ka 100 ha ki san snem ban wan.
Napdeng ki kyrtong kiba rem, u Myntri Rangbah barim ka Sikkim u Pawan Kumar Chamling u dei uwei na ki kyrtong ba kham paw bad une u la rem na baroh ar tylli ki konstitwensi kiba u ïakhun ha kane ka ilekshon MLA na Poklok Kamrang konstitwensi bad Namcheybung konstitwensi.
U Chamling u la shahjied kum u MLA haduh phra sien kynthih khlem pat shah rem, hynrei ha kane ka ilekshon MLA, 2024 u la rem syndon na baroh ar tylli ki konstitwensi.
U Chamling u la shah pynliem ha u kyrtong ka Sikkim Krantikari Morcha (SKM) u Bhoj Raj Rai da 3,063 ‘vote’ na Poklok Kamrang konstitwensi ha kaba u Rai u la ïoh 8,037 ‘vote’ katba u Chamling u ïoh 4,974 ‘vote’.
U Chamling u rem ruh ha u kyrtong ka SKM u Raju Basnet da 2,256 ‘vote’ na Namcheybung konstitwensi ha kaba u Basnet u la ïoh 7,195 ‘vote’, katba u Chamling u ïoh 4,939 ‘vote’.
Ha Arunachal Pradesh, ka BJP kan wanphai biang ban synshar hadien ba ka la ïoh jingjop ha 46 tylli ki konstitwensi na 60 tylli ki konstitwensi.
Ka jingñiew ‘vote’ ha ka ilekshon MLA ha Arunachal Pradesh ka la long tang ha 50 tylli ki konstitwensi na 60 tylli ki konstitwensi. Ha 10 tylli ki konstitwensi, ka BJP ka la ïoh jingjop lypa khlem jingïakhun kaba kynthup ïa u Myntri Rangbah u Pema Khandu.
Kiwei pat ki seng saiñ pyrthei kiba la ïoh jingjop na ki katto katne ki konstitwensi ki kynthup ïa ka National People’s Party (NPP) kaba la ïoh 5 ngut ki MLA.
Ka Nationalist Congress Party (NCP-Ajit Pawar) ka la jop ha 3 tylli ki konstitwensi, katba ka People’s Party of Arunachal (PPA) ka ïoh 2 ngut ki MLA. Ka Congress kaba ju ïoh ban synshar ha ki snem ba la leit noh ha Arunachal Pradesh ka la ïoh tang uwei u MLA ha kane ka ilekshon MLA kaba mynta, nalor 3 ngut ki kyrtong shimet kiba la jop na 3 tylli ki konstitwensi.
Da kane ka jingjop, ka BJP kan sa thaw Sorkar biang ha Arunachal Pradesh ha kaba u Pema Khandu un shimti biang kum u Myntri Rangbah ka Jylla sa shisien.
U Khandu u la ñiew ïa kane ka sngi kum ka sngi sahkynmaw ha ka khana pateng jong ka Jylla Arunachal Pradesh namarba ka BJP ka la shna jingkheiñ thymmai ha ka ilekshon sha ka Ïingdorbar Thawaiñ ka Jylla.
“Ha ka ilekshon ha u snem 2019, ngi la ïoh jingjop ha 41 tylli ki konstitwensi bad mynta ha u snem 2024, ngi la ïoh jingjop ha 46 tylli ki konstitwensi,” la ong u Khandu.
