Shillong, Jylliew 02
U Secretary ka Meghalaya Pradesh Congress Committee (MPCC), Bah Manuel Badwar ha ka Sngi U Blei u la ong ba ka jingïakhun ha Shillong Parliamentary konstitwensi ka long hapdeng ka Voice of the People Party (VPP) bad ka Congress bad ka seng ka ban jop ha kane ka ilekshon kan tam tang khyndiat ïa kaba wan ba-ar.
“Katkum ki jingkheiñ, ngi don ka jingkyrmen ha baroh ar tylli ki konstitwensi. Haba phai sha Shillong Parliamentary konstitwensi, ka jingtam kan long khyndiat; lada tam u Prah ruh, khyndiat,” la ong u Bah Badwar.
U la ong ruh ba ka seng ka don ka jingshaniah skhem ha ki nongthep ‘vote’ ba jar-jar wat la ka ‘vote’ kaba la thep da ka jingshongshit ka leit sha u Prah.
“Ka jingïakhun hi ka long hapdeng ka VPP bad ka Congress bad katkum ki jingkheiñ, ngin dang lah hi, naba ngi khlaiñ ha ka thaiñ Ri-Bhoi, Jaiñtia, Shillong City. Ka VPP ka khlaiñ ha ki khap sor. Tangba ki jingkheiñ kim long kiba paka,” la ong utei u nongïalam.
Haba phai sha Ri-lum Garo, u la ong ba ka jingïakhun kan long hapdeng ka Congress bad ka National People’s Party (NPP) katba ka lyer ka beh sha ka Congress katkum ki jinglong-jingman.
“Ki briew ki kwah ïa ka Congress bad shathie ki kham phai khmat sha kito ha ka kyrdan jong ka ri, hynrei ngim lah ban kyntait ïa ka NPP. Peit ha Arunachal Pradesh ruh ki la jop bad kane ka pyni ba ki nang ban pynïaid ïa ka ilekshon,” u la ong.
U Secretary ka MPCC, ha kawei ka liang u la ong ba ka NPP haba phai sha Ri-lum Khasi, kam don lyer ha kane ka ilekshon ba dang shu dep.
“Ngin sa peit beit ïa ka risol lashisngi. Kan ym da noh than eh. Ki jingtam kan ym long shuh da ki lak hynrei tang khyndiat khamtam naba ka ‘vote’ ka la pait,” la ong u Bah Badwar.
Kum ban shu kdew hangne, ka Jylla ka la leit sha ka ilekshon Lok Sabha ha ka kylla nyngkong jong ka ilekshon, kata ha ka 19 tarik Ïaïong mynta u snem na bynta ka Shillong bad Tura Parliamentary konstitwensi.
Haba phai sha ka Shillong Parliamentary konstitwensi, ki kyrtong kiba ïa aireng ha ka ilekshon ki kynthup ïa u Dr. Ricky A.J. Syngkon na ka VPP, MP ba mynta – Bah Vincent H. Pala na ka Congress, Dr. Ampareen Lyngdoh na ka NPP, Bah Robertjune Kharjahrin na ka RDA, Prof. Lakhon Kma bad Peter Challam kum ki kyrtong shimet.
Shuh shuh ha Tura Parliamentary konstitwensi, ki kyrtong kiba la ïa aireng ha kane ka ilekshon ba la dep ki kynthup ïa u Saleng Sangma na ka Congress, ka MP ba mynta – Agatha Sangma na ka NPP, Zenith Sangma na ka Trinamool Congress (TMC) bad Labenn Ch Marak kum u kyrtong shimet.
Ïa ka risol jong ka Shillong bad Tura Parliamentary konstitwensi yn sa pynbna lang bad ka ri baroh kawei ha ka Sngi Ba-ar, 4 tarik Jylliew.
