Shillong, Jylliew 02
U General Secretary ka United Democratic Party (UDP), Dr. Jemino Mawthoh u la ong ba ka jingpynïasoh ïa ki kolej sha ka skulbah ka Jylla ka long ka mat kaba hap ban pyrkhat sani bha.
“Wat la ka jingpynïeng ïa ka skulbah ka Jylla ka long kaei-kaei kaba hap ban pdiang, bad ka sienjam kaba biang eh, ka jingpyntyllun kam kaba ïahap, ka donkam ïa ki jingpynbit jingpynbiang kiba bniah ban pyntreikam pura ïa ka,” la ong u Dr. Mawthoh ha ka kyrwoh khubor.
U la ong ruh ba wat la ka skulbah ka Jylla ka la ïaid lyngba ka rukom kaba dei ban long aiñ, hynrei ka jingpule bad jingpynïaid kam lem bad ki jingdonkam ki dei ban long kiba beit bad ryntih.
Haba kdew halor ka jingdonkam ïa ki kyndon kiba ïar, kumjuh ki ‘Ordinance’, bad ki jingteh kyndon, u Dr. Mawthoh u la ong ba kine baroh ki dei ban don ha ka rukom kaba dei.
U la pynsngew ba ka jingïoh jingbit bad ka jingïadei ba ïajan – kim dei tang kine ki mat kiba donkam haba phai sha ka jingpynïasoh, hynrei donkam ruh ïa katto-katne kiei-kiei kiba donkam lypa nalor kiwei-kiwei ki jingdonkam.
“Hato ka skulbah ka Jylla ka lah ban wanrah ïa ki sobjek bapher-bapher hapoh ka tnat pule ‘Arts’, ‘Science’, bad ‘Commerce’ ha kum kane ka por? Ka jingpynkha ïa ki tnad pule kiba pher ha la ki jong ki jong ki tnat pule ka dei ban beit ryntih bad ki jingtyrwa jong ki kolej. Ki kolej kim lah ban pynïasoh tang shi bynta bad kim lah ban pynïasoh baroh arliang,” u la ong.
Haba pynpaw ba ka jingpynïasoh kan ïalam ruh sha ki jingktah ha ka liang ka pisa-tyngka, u General Secretary u la ban jur ba ban wanrah ïa ki tnad pule bapher-bapher, ka jingdon jong ki nonghikai bad kiwei-kiwei ki jingdonkam ka long ka mat kaba hakhmat eh.
“Ka jingsiew katkum ka UGC sha ki nonghikai kan ai mynsiem haba phai sha ka jingshakri. Nalor kane, ha kano ka rukom yn thaw ïa ki kynhun haba ïadei bad ka jingpule bad ki bor pynïaid? Kumno ka rukom pynlong ïa ki eksamin? Naduh ka jingpynkhreh ïa ka ‘Syllabus’, jingpynkhreh ïa ki jingkylli, jingpynkhreh ïa ki eksamin bad jingpynbeit ïa ki jubab. Kumno haba ïadei bad ka Library?,” la buh jingkylli utei u nongïalam.
Shuh shuh haba bynrap ba ka don ka jingsngewkhia haba ïadei bad ka jingsuk ha ka leit ka wan, u la ong ba haba nujor bad ka Ri-lum Garo, ka Ri-lum Khasi-Jaiñtia ka don bun tylli ki kolej bad kine ki long katto-katne ki jingkylli kiba hap ban buh jingmut.
“Ka tnad pule-puthi ka Jylla ka la ong ba ka samoi pule banyngkong kan sdang naduh u snem 2025-26. La thaw ïa ka ‘Board of Governors’. Kumba ka long, 100 tylli ki kam ba kynthup ïa ka kam VC bad Registrar la dep ban mang bad ka Sorkar Jylla kan lut `45 klur man u snem. Ka jingktah ha ka liang ka pisa-tyngka halor kane ka long `45. 7 klur man u snem bad ka jingpynlut baroh na bynta ban tei ïa ki jingdonkam na bynta ka skulbah ka long `16.96 klur. Ka jingpynlut haba ïadei bad ka jingpynïaid ruh kan bun,” la ong u Dr. Mawthoh.
