Shillong, Jylliew 02
Ka jingther u slap lajan man ka sngi mynta la katto-katne taïew ka la pynlong ïa ka Umïam ba kan kiew kloi. Kat haduh ka Sngi U Blei ka 2 tarik Jylliew, ka um ka la poi 3195.72 phut lada nujor bad mynshem snem (2023) ka jingkiew ka dam ka long tang 3189.33 phut haduh ka 22 tarik Jylliew 2023.
Kum ban pynkynmaw haduh u Jymmang 2023 namar ka jingduna palat u slap la ïohi ruh ïa ka surok rim ha Umïam bad poi shaduh ka jaka ba shongkai pyngngad. Pynban mynta u snem namar ka jingïoh slap bun ka jingtyrkhong ka Umïam ka kham duna.
Kum ban pynkynmaw biang namar ka jingtyrkhong ka Umïam ka jingpynlip bording da ka tnad MeECL mynshem snem ka la treikam naduh u bnai Ïaïong haduh ban da dap bha ka Umïam. Lada ïa nujor mynta u snem pat ka jingpynlip bording ka kham duna namar u slap u la wan hap kloi naduh u bnai Lber.
Ka jingther u slap mynshem taïew naduh ka 27 tarik bad 28 tarik ka la pynlong ïa ar tylli ki wah kiba don hapdeng ka sor Shillong kata ka Wahumkhrah bad Umshyrpi ba kin pyndap ïa ka Umïam kaba dei ka jaka ban saiñ ïa ka bording ban sam sha ki longïing ka jylla.
