Shillong, Jylliew 02
U Secretary shnong ka Laitkor Mawrie Lumheh, Bah Francis Jana Nongbet, u la ong ba ka jingpynsangeh ïa ki bar jylla ba kin trei ha ki dukan bad karkhana ka long ka jingkyrmen ïa ki khun ki kti.
Haba ïakren bad ki nongthoh khubor hadien ba la dep jurip ïa baroh ki dukan ha katei ka shnong hapoh ka jingïalam u Rangbah shnong Bah Pynshailang Mawrie, u Bah Francis u la ai khublei ïa ki nongshong shnong bad ki trai dukan kiba la ïatreilang ban phah mih noh ïa ki nongtrei bar jylla da kaba buh bujli da ki samla Khasi.
“Ngim dei ban kheiñ beiñ ïa ki samla Khasi namar lada ïatrei ïa ka kam kaei kaba u bar jylla u lah ki samla Khasi ruh ki lah ban trei” u la ong.
U la pynpaw ba don kiba kynnoh ba ki Khasi kim lah ban trei ïa ka kam kumba lah u bar jylla hynrei u la ong ba mynshwa ha Laitkor ki tah ’tile’ da ki bar jylla bad mynta ki Khasi ki la lah ban tah ’tile’ ha ki ïing briew.
Namar kata, u la phah ka khubor sha ki samla Khasi ba ki dei ban trei shitom ym ban ngop ha ki jingdih pynbuaid khamtam ïa u drok ba la jyllei.
U la kyntu ruh ïa ki samla Khasi haba ki trei ïa ka kam ki dei ban trei hok, trei minot bad long kiba ïaishah khnang ban nym ïoh lad ki bar jylla ban wan trei ha kane ka jylla.
U la ai khublei ruh ïa u Rangbah shnong uba la lah shisha ban pynkohnguh ïa ki trai dukan bad karkhana ban phah mih ïa ki bar jylla katba ki dang khynñiat namar ha kiwei ki shnong ba ki la bun ka la jynjar ïa ki ban beh.
Shuh shuh u Bah Francis u la pyntip ba kane ka jingbeh noh ïa ki nongtrei bar jylla la ai por haduh hynriew bnai naduh 1 tarik Nohprah 2023 bad kut ha ka 31 tarik Jymmang 2024.
