Shillong, Jylliew:
Ka Amazon ka trei tyngeh kumno ban kyntiew ïa ka imlang-sahlang da kaba wanrah ïa shibun tylli ki sienjam treikam, kaba la ai jingmyntoi ïa palat 7.8 Million ngut ki briew ha kylleng ka pyrthei. Ka kompani ka la pyndonkam ïa ki lad ki lynti bad ki buit stad treikam ban ai ïa ki jingnang jingtip bad ki jinghikai sha ki paid nongshong shnong. Ka Amazon ka la aiti lut ïa ka jingtreikam jong ka na ka bynta ban ai ïa ki jingnang jingtip kiba donkam bad ki jinghikai bapher bapher na ka bynta kito ki bym ju ïoh koit ïa kum kane ka lad, lyngba ki prokram kum ka Amazon Future Engineer, kaba thmu ban wanrah ka jingpynïasoh ïa ka jingai jinghikai ïa ka Computer Science Education na ka bynta ki samla pule na ki bynta bapher bapher. Nalor kane, la pynmih ruh ïa bun tylli ki prokram ai Scholarship khnang ba ki samla pule kin ïoh ïa ka jingkyrshan pisa.
Ka Amazon ka la sdang ruh ban buh ïa ki tiar ki tar na ka bynta ban ai jingïarap lada don kano kano ka jinglynshop ki bor ka mariang kynthup naduh ki jaka rieh bad ki tiar ki tar kiba ïadei bad ka khuid ka suba sha ki nongshong shnong kiba donkam hapoh 72 kynta. Ka kompani kan pyndonkam ïa ki bynta treikam jong ka kiba ïadei bad ka jingpynbit pynbiang ïa ka kit ka bah ban pynkit ïa kine ki jingïarap ha kylleng ka India. Ka Amazon India ka la ïatehlok ruh bad ki 160 tam ki kynhun treimon sngewbha bad pyntreikam ïa ki 20 tam ki prokram kiba ai jingmyntoi bad 170 tam ki Project. U Manish Tiwary, Vice President bad Country Manager na ka bynta ka Amazon India, u ong, “Ngi trei tyngeh ban wanrah ka jingmyntoi kaba ïaineh bad ngin ïai bteng ban pyndonkam ïa ki lad ki lynti jong ngi na ka bynta ban wanrah ïa ki jingbha bad ngin nang pyrshan ban long i paramarjan ba bha na ka bynta ka imlang sahlang kaba ngi trei ngi ktah bad kaba ngi sah.”
Ka Amazon ka buh ha khmat ïa ka imlang-sahlang da kaba pyrshang ban kyntiew ïa ka koit ka khiah, ka khuid ka suba bad ka seng kam seng jam, ban thaw ïa ki lad aikam-aijam ïa ki kynthei bad ki briew kiba duna dkhot met, kaba pyni ïa ka jingtrei ba radbah ban kyntiew ïa ka ïoh ka kot jong baroh.
