Shillong, Jylliew 02 (UNI)
Ki jingpynkhreh na ka bynta ka jingñiew ‘vote’ ha ka Sngi Ba-Ar na ka bynta ka ilekshon Lok Sabha ha Shillong bad Tura ki la biang lut nadong-shadong bad kin don kumba 2,000 ngut ki ban ïadon bynta ha ka jingñiew ïa ki ‘vote’ ha kine ki artylli ki konstitwensi.
U Chief Electoral Officer (CEO) ka jylla, u Dr. B.D.R. Tiwari, u la ong ba ka jingñiew ‘vote’ kan sdang ha ka por 8 baje mynstep. U la ong ba ki don phra tylli ki jaka ñiew ‘vote’ na ka bynta ka Shillong Parliamentary Constituency ba kynthup ha ki hynñiew tylli ki distrik bad ha Sohra Civil Sub-Division. Katba na ka bynta ka Tura Parliamentary Constituency, ka jingñiew ‘vote’ kan long ha ki san tylli ki jaka kiba don ha ki san tylli ki distrik ka Rilum Garo.
Nalorkata, u la ong ba kin don kumba 1,200 ngut ki briew ki ban ïadon bynta ha ka jingñiew ‘vote’ ha Shillong Parliamentary Constituency bad 800 ngut ha Tura.
“Yn pyndonkam 369 tylli ki miej ha ki hynñiew tylli ki distrik ha Shillong Parliamentary Constituency bad 244 tylli ha ki san distrik kiba hap ha Tura Parliamentary Constituency,” la ong u Tiwari.
Shuh shuh u la ong ba ka jingap pahara ha ki jaka ñiew ‘vote’ kan long ha ki lai bynta, bad na ka liang ka Election Commission jong ka Ri India ka la phah ïa 12 ngut ki nongpeit pyrman ha ka sngi ñiew ‘vote’ ha Shillong Parliamentary Constituency bad hynriew ngut na ka bynta ka Tura Parliamentary Constituency.
Ki kyrtong na Shillong ki kynthup ïa u MP ba mynta, u Bah Vincent H. Pala na ka Congress, Kong M Ampareen Lyngdoh na ka National People’s Party (NPP), Dr Ricky Andrew J Syngkon na ka Voice of the People Party (VPP), u Bah Robertjune Kharjahrin na ka United Democratic Party (UDP), bad arngut ki kyrtong khlem seng, u Prof. Lakhon Kma bad u Bah Peter Shallam.
Ha Tura, ka jingïakhun ka long hapdeng ka MP ba mynta, ka Agatha K Sangma na ka NPP, u Saleng A Sangma na ka Congress, u Zenith M Sangma na ka Trinamool Congress, bad uwei u kyrtong khlem seng, u Laben Ch Marak.
