Shillong, Jylliew 02
Ha ka jingtrei shitom ban tehlakam ïa ki kam be-aiñ sha shiliang khappud, ha ka 1 tarik Jylliew, hadien ka jingïoh jingtip kaba tikna, ki shipai ka 193 Bn BSF Meghalaya, ki la ïoh bat ïa ki nongkhaïi drok, bad kurup 2,469 tylli ki dawai kuli ‘Yaba’ lem bad 10 gram u ‘Heroin’.
Katei ka jingkhynra ka la jia ha ka thaiñ ba hap hapoh thanat Ranikor, South West Khasi Hills District.
Kitei ki nongkhaïi ba shah bat kiba shong da ka kali ‘Alto’ ki la shah bat ha ka kynhun BSF katba ki dang leit sha ka jaka khappud hajan Ranikor.
Ïa kitei ki nongkhaïi drok la ithuh kum u Joydeep Paul bad Nabajit Sen, nongshong shnong ka East Khasi Hills.
Ïa u dawai kuli ‘Yaba’ bad u ‘heroin’ ba la ïoh kurup lem bad kitei ki 2 ngut ba shah bat, la aiti noh sha thanat Ranikor ban leh ïa kaba donkam.
Kane ka jingkhynra ka kdew ïa ka jingminot thop ka BSF ha ka ban tehlakam ïa ka jingsniew ba ïadei bad ka jingkhaïi tuh ïa u drok ha shi lynter ki jaka khappud.
