Shillong, Jylliew 02
Ka Jylla Assam kan sa ïoh ban buh sa ïa ka jaka pule kaba paw ka Indian Institute of Management (IIM) bad kane ka dei ka IIM ba-ar ha ka thaiñ Shatei Lam Mihngi hadien ba ka Sorkar Pdeng ka la buh ïa ka IIM Shillong kaba dei banyngkong ha ka thaiñ Shatei Lam Mihngi.
Ka shithi kaba la phah da ka tnat pule puthi ka Sorkar Pdeng sha ka Sorkar Assam ka la pyntip ba katkum ka kaiphod jong ka Site Selection Committee, la ïoh ïa ka jingmynjur jong u Myntri ka tnat pule puthi na ka bynta ban buh ïa ka IIM kaba thymmai ka ban don ha Assam ha Marabhita hajan Guwahati ha Kamrup District bad la mynjur ruh ba ka IIM Ahmedabad kan long ka nongbtin lynti bad peit lang ha kaba ïadei bad jingtyrwa ban buh ïa kane ka IIM kaba thymmai ka ban don ha Kamrup District.
La ong ba ka Site Selection Committee ka la dep ban rai ïa ka jaka na ki saw tylli ki jaka kiba la dep ithuh lypa da ka Sorkar Assam.
Ka shithi ka la ong ruh ba ka IIM Ahmedabad kan sa lamkhmat mynta ban pynkhreh ïa ka Detailed Project Report (DPR) na ka bynta ban tei ïa ka IIM ha Assam da kaba ïatreilang ryngkat bad ka Sorkar Jylla.
Na ka liang u Myntri Rangbah ka Assam, u Himanta Biswa Sarma u la ong ba kane ka dei ka jingai sngewbha kaba kyrpang jong u Myntri Rangbahduh ka ri u Narendra Modi ïa ka Jylla Assam ha kaba u la pynpaw ka jingsngewnguh ïa u Modi bad ïa u Myntri ka tnat pule puthi ka Sorkar Pdeng u Dharmendra Pradhan namar ka jingïatreilang bad jingshim ïa kane ka sienjam.
U Himanta u la ong ba ha ki 18 bnai ba la leit na ka liang ka Jylla ka la pyni ïa ki nongrim kiba khlaiñ bha hakhmat u Myntri ka tnat pule puthi, u Dharmendra Pradhan bad ka tnat pule puthi ka Sorkar Pdeng ban ïoh ïa ka IIM ha Guwahati.
U la ong ba ka Sorkar Jylla ka la tyrwa ruh ban pynïoh da ka jaka kaba biang bad kham long pdeng ha Guwahati ha ryngkat ki jingkyrshan na ka bynta kane jingthmu.
“Kane ka jaka pule ka long ka jingkylla ha ka liang ka pule puthi na ka bynta ka Assam ka ban pynlong ruh ïa ka Assam kum ka Jylla kaba long pdeng ha ka pule puthi ha ka phang Mihngi jong ka India bad kan ïarap ruh ban pynpoi sha ka jingangnud ha ka liang ka ïoh ka kot,” la pynpaw u Himanta.
Kum ban pynkynmaw, ka IIM ka banyngkong eh ha ka thaiñ Shatei Lam Mihngi (North East) ka dei ka IIM Shillong kaba la sdang ha u snem treikam naduh u snem 2008. Ka rai ban buh ïa ka IIM Shillong la shim ha ka jingïalang ha Shillong hapdeng u Myntri ka tnat pule puthi ka Sorkar Pdeng bad ki Myntri Rangbah jong ki Jylla na ka thaiñ Shatei Lam Mihngi ha u Jylliew 2004.
La buh mawnongrim ban tei ïa ka IIM Shillong ha ka 1 tarik Nohprah 2007 da u Myntri barim ka Sorkar Pdeng u Arjun Singh (ba la khlad noh) bad ïa ka jinghikai ha kane ka jaka pule la pynlong shipor ha Mayurbhanj Palace, Nongthymmai ha kaba la plie da u Myntri Rangbah barim ka Jylla, u Dr Donkupar Roy (ba la khlad noh) ha ka 4 tarik Naitung, 2008.
